Giila sa kapaulisan nga shabu queen ug gaway sa drug lord sa Central Visayas nga si Franz Sabalones ang nasikop sa mga sakop sa Provincial Intelligence Unit sa Cebu Provincial Police Office (PIU-CPPO) inabagan sa Provincial Drug Enforcement Unit ug San Fernando Police Station sa Barangay North Poblacion, lungsod sa San Fernando.
Lakip sa nasikop ang upat niini ka kauban nga nakuhaan og pinakete sa gituohang shabu nga mo balor ang tanan sa P149,600.00. Ang nadakpan giila nga si Cathleen Hope Immis Rabon, 45, taga North Poblacion, San Fernando.
Matod ni Police Lieutenant Colonel Randy Korret, hepe sa PIU sa CPPO, nga taudtaod na nila nga gipanid-an ang maong drug personality.
Aduna matod pa kini contact sa sulod sa bilangoan sa siyudad sa Sugbo nga nalambigit usab sa illegal nga drugas.
Apil sa nasikop ang iyang mga kauban nga silang Leo Capilitan Tavera, 35, taga Cogon Pardo, dakbayan sa Sugbo; Ryan Entero Paraguso, 32, taga 5-A Lorega San Miguel, Cebu City; Naigel Eridia Alforue, 51; ug Elizabeth Pacquiao Villarin, 48, nga pulos taga North Poblacion, San Fernando.
Matod ni Korret nga padayon pa ang ilang imbestisyon labot sa supplier ni Rabon alang sa ilang himuon nga follow up operation.
Kagahapon, Disyembre 10, gipasakaan nag kaso sa kalapasan sa Section 5 and 11 Article 2 sa republic act 9165. / AYB