Mga border control point sa Siyudad sa Sugbo ablihan alang sa mga tawo nga mosulod ug mogawas sa dakbayan gikan sa mga silingang lugar.
Nunot kini sa gipagawas nga executive order ni Mayor Edgardo Labella aron pagsuspenso sa quarantine pass sa pagsugod sa Misa de Gallo sa Disyembre 16, 2020.
Gipahibawo ni Cebu City Police Director Police Colonel Josefino Ligan nga di na nila estriktohon ang pagbantay sa mga tawo nga mosulod sa dakbayan sa Sugbo.
Apan matod ni Ligan nga aduna gihapoy pulis nga magbantay aron monitoron ang mga tawo nga mosulod sa siyudad sama sa pagpangitag identification card (ID) pagmatuod nga dili sila menor de edad nga nagpanuigon og 15 anyos paubos ug 65 pataas.
KRIMEN MOSAKA
Napanglantawan usab niya nga mosaka ang crime volume sa tibuok dakbayan kay wa nay quarantine pass nga mosangko sa pagdaghan sa mga tawo nga makasulod sa siyudad.
Daghan na og bantayanan sa kapulisan ilabina sa natad sa kriminalidad sama sa kawat ug pagpanulis.
Gipasalig ni Ligan nga sila nangandam sama sa pagpakatap og 167 ka mga pulis sa 35 ka mga dagkong simbahan aron mapadayon ang pag-obserbar sa minimum health standard.
Gawas niini, adunay mga patrol car nga mag-roving gikan sa kaadlawon sa mga residential area aron di makapahimus ang akyat bahay.
Ila usab nga patrolyahan ang kadalanan, terminals ug pantalan sa siyudad.
“Dako dako gyud nga trabaho and yet naa gihapon ta,” matod ni Ligan.
Gipasaligan ang CCPO nga ang Cebu City Hall motabang kanila pinaagi sa papakatap og kapin sa 300 ka tawo ubos sa anti-mendicancy office sa Siyudad. Bisan pa man sa maong sitwasyon niawhag si Ligan sa mga debotong Katoliko nga motambong sa Misa de Gallo nga dili magdala og bata nga 15 anyos paubos ug 65 anyos pataas tungod kay padayon sila nga gidid-an nga makagawas.
Magsuwat usab sila sa papel sa ilang ngalan, address ug cellphone number nga ihulog sa drop boxes nga gibutang sa ganghaan sa simbahan alang sa contact tracing kon adunay mahitabong Covid 19 transmission. /