Napugwat ko ganiha pagmata sa kakuyaw dihang nahurot pagpanlagas akong ngipon kinaon sa kagumkom nga chicharon. Maygali kay damgo ra diay to. Pwerting inum nako og tubig para maulian.
Di ko kalimot sa gisulti sa akong mga katiguwangan nga kuyaw kuno ning magdamgo og ngipon nga nangaibot kay ang pasabot ini dunay mawala nga imong minahal, bana, uyab o miyembro sa banay, o dunay relasyon nga maguba. Aron kuno masumpa, kinahanglan ipanabi kini unya di itago sa hilom aron di matinuod.
Apan sa akong pakikusi ug basa sa artikulo ni Ian Wallace, usa ka dream psychologist, nga maoy nagsuwat sa libro nga “The Complete A to Z Dictionary of Dreams,” sukwahi kini sa mga gipang sulti sa mga nag-una nako sa duyan.
Matod ni Wallace ang ngipon simbolo sa gahom ug kompiyansa sa kaugalingon. Ang pagdamgo nga nangaibot ang ngipon nagpasabot nga naay mga panghitabo sa actual nga kinabuhi nga maoy nakaingon sa pagkawala sa kumpiyansa sa kaugalingon ug gahom.
Laing kumon nga damgo nga akong nabasahan kining pagkahulog. Puno ni Wallace “red flag” kini ug kumon sa mga tawo nga dunay bug-at nga gipas-an sama sa problema sa trabaho, o ba kaha sa pakig-relasyon.
Nagdamgo og lungon o namatyan. Ingon si Wallace di ni dapat ikahadlok kay ang pasabot ini dunay gustong putlon o undangon nga naandang tulumanon ang nagdamgo gikan sa natad sa relasyon, trabaho o karaang kasinatian. Kining ingon ini nga damgo nagdasig hinuon pagsugod og bag-o (fresh start).
Damgo nga gigukod. Positibo kini og pasabot kay andam na ang tagtungod pakig-atubang sa iyang mga problema nga dugay ng niyang gidaladala.
Damgo nga naglu-ib nga pares. Matod sa mga eksperto kini mahitabo kung ang partner kanunay nga busy sa laing butang o ginbuhaton unya wa nay panahon para sa pares. Ang kakuwang sa kumpiyansa ug pagsalig sa pares maka-padamgo sab og pagluib.
Damgo nga naglupad sama ni Darna. Kining ingon ini nga damgo nag-engganyo sa tagtungod sa pagbuhi sa mga isyung dugay ng gipangpas-an.