Kining pahibalo nga paluagan na ang mga quarantine checkpoint sa kadalanan maisip nga dakong kaugmaran alang natong tanan nga taudtaod na nga gigapos sa daghang protocvol taliwala sa pandemya. Sa ato pa gawasnon na nga makasulod ug gawas ang mga tawo gikan sa probinsiya padung sa dakbayan sa Sugbo.
Hinuon, ang kapulisan nipasidaan nga padayon nilang monitoron ang bisan kinsa nga mosulod pagsiguro nga way protocol nga malapas.
Sa pagka tinuod lang dugay na kaayo na kaayo kini nga gipaabot ilabi na sa mga tawo nga apektado ang panginabuhi gumikan sa mga protocol. Ning panahon sa kalisod,di man siguro nindot paminawon nga mogahin lang ka og panahon nga isuroysuroy ang katapausang sensiyo sa imong bulsa pinaagi sa paglugsong sa siyudad.
Ang mga kauban nako sa taas kaayong linya sa mga pasahero nga nagpaabot og bus nga masakyan sa Barangay Bulacao, Cebu City niadtong panahon nga gitak-opan pa ang South Bus terminal, niasoy kong unsa kalisod alang nilang taga probinsiya nga makasulod sa dakbayan sa Sugbo. Gihulagway nila kini nga usa ka dakong kalbaryo kay gipugngan ang ilang panlihuklihok aron maka kita og kuwarta.
Paglabay sa mga semana nunot sa pag-us-os sa mga kaso sa Covid-19, medyo miluagluag na ang mga boundary og gihangop kini sa tanan ilabi na niadtong nangita og kapanginabuhian. Sa wala pa mobuto ang Covid-19 dinhi sa ato niadtong Marso, nakauban nako ang grupo sa mga magsisibyasa sa TV ug Radio station nga gipatak-opan sa gobyerno. Unang semana kadto sa bulan sa Pebrero.
Tayming kay usa sa akong gikauban bag-ohay palang nabalik gikan sa pagbakasyon sa Hongkong. Sa maong tapoktapok iyang gipaambit ang iyang mga kasinatian. Usa sa iyang gihihisgutan mao ang isyu sa lockdown.
Matod niya nga basi sa iyang nakita didto sa Hong Kong estrikto nga pagpatuman sa pagsul-ob og face mask apil na ang pagpanghunaw, apan wala malakip ang social distancing. Gani sa train nga iyang gisakyan wala siyay nabanatayan nga kausaban sa lingkoranan. Magtapad gihapon ang mga pasaherro. Sa ato pa padayon nga nakig-away ang gobyerno batok sa Covid-19 apan pinili ra ang mga establismento nga gitak-opan aron makapadayon sa pagpanarbaho ang katawhan ug dili magkutoy ang train.