SECTIONS
Superbalita Cebu
Saturday, September 25, 2021
SUPERBALITA CEBU

Albor: Pangwarta sa immigration

Sandiganan

Sa kapungot ni Pres. Rodrigo Duterte batok sa pangwarta sa Bureau of Immigration (BI), iyang gitaktak sila si Totoy Magbuhos, Deon Albao, Paul Borja, Anthony Lopez ug Dennis Robles. Ports Operations Chief Red Mariñas nga giingong lider sa Pastillas scheme ug kanhi mga opisyal Glenn Comia, Bien Guevarra, Den Bensol mga tinudlo ni kanhi Department of Justice (DOJ) Sec. Vitaliano Aguirre.

Septiyembre 2020, gisagpa og kaso ang 19 ka mga opisyal sa BI. Nob. 2020 86 ka mga opisyal girekomendar sa National Bureau of Investigation (NBI) nga kasohan. Ombudsman misuspenso og unom ka bulan sa 44 ka mga opisyal sa BI pinangulohan sa Port Operations Grifton Medina.

Sa inbestigasyon ubos sa komitiba ni Sen. Riza Hontiveros nautingkay ang pangilkil og P10,000 matag Insek nga motugpa sa Ninoy Aquino International Airport (NAIA). Moabot nag P40 bilyunes ang nakwarta sa Pastillas scheme. Pasudlon nga dili kutikutihon para makatrabaho sa Philippine Oveseas Gaming Operations (Pogo).

Si BI officer Allison Chiong maoy lig-ong tinubdan ni Hontiveros sa maong panuborno. Gihulagway nga Pastillas kay ang isubornong kwarta nga itunol sa mga Insek pinutos og linikit nga papel susamag kendi. Konsabo ang mga kawani sa tugpahanan nga nakig-alayon sa Chinese Travel Agencies.

Si Chiong mibutyag sa Pastillas operation nga dakong sindikato. Ang BI gidumala ni Commissioner Jaime Morante. Minilyon ka mga Insek ang nia sa Pilipinas nga nakwartahan sa taga imigrasyon ug tugpahanan.

Si Sen. Richard Gordon sa iyang pakisusi nga 470 Chinese workers sa Pogo nga mikatap sa Metro Manila, Davao, Olangapo ug Central Visayas. Sen. Panfilo Lacson mipadayag nga 3,000 ka mga sakop sa People’s Liberation Army plantalya nga nagtrabaho sa Pogo kuyaw mahimong probinsya sa China ang Pilipinas. Dihay label sa produkto nga dunay address nga Manila, province of China nga gikasuko ni Mayor Isko Moreno.

Sa kinatibuk-an mokabat sa upat ka milyon ang mga Chinese nga nia sa Pilipinas. Nagsugod ang kurapsyon sa BI sa dihang ang DOJ mitangtang sa overtime pay sa 2016. Lalim nang ang ilang makobra sa overtime doblihon pa sa ilang suweldo. Wala gyoy katagbawan ang kawkawan bisan dagko nag suhol ug daghan ang mga benipisyo.

Apan ang kurapsyon walay luna sa pamunoan ni Duterte. Gitukod ang Mega Task Force nga maoy molutos sa mga kawatan sa salapi sa gobyerno nga molungtad ang inbestigasyon sa 2022 sa kataposang utong sa administrasyon. (csa_1156@yahoo.com / 09064648954)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!