Maestra sa usa ka tunghaan sa Dakbayan sa Toledo ug konsehal sa barangay sa samang dakbayan nasundan sa asawa sa konsehal nga nisulod sa usa ka lodging house sa lungsod sa Pinamungajan, Sugbo.
Si Police Major Felicisimo Aranas, Jr. , hepe sa Pinamungajan Police Station, niingon nga ang asawa sa konsehal nangayo kanila og pakitabang aron pagsakop sa akto sa duha.
Nasundan ni Emily (di tinuod ngan), 49, asawa ni konsehal Alan (di tinuod ngan), 49, kuyog ni Rochel (dili tinuod nga ngan), 38, nianang buntag sa Disyembre 11.
Hinungdan nga nangayo ug pakitabang ang asawa sa kapulisan ug pag-abot nila sa lodging house, wala dayon mangabli ang iyang bana hinungdan nga nagduda ang asawa nga nagduwa gyud og kalayo ang duha.
Wala magdugay giablihan ang kwarto apan ang mga pulis wala magtuo nga duna diay agianan sa luyo sa maong kuwarto sa lodging house hinungdan nga ang babaye na lang ang naabtan sulod sa kwarto nga nakailis na ang babaye.
Matod ni Aranas nga ang maestra minyo usab parehong taga Toledo.
Dugang ni Aranas, ang maestra gitanggong karon sa prisohan sa Pinamungajan samtang ang bana sa nagreklamo nakasibat apan pasakaan gihapon kini og kaso ang duha nga concubinage sa asawa sa konsehal.
Samtang, ang bana sa maestra pwede usab nga mopasaka og kaso nga adultery batok na sa duha.
Dugang ni Aranas nga nagtuo ang asawa sa konsehal nga niadtong pandemiya natawo ang ilang tinagoang relasyon. / BBT