Ubay-ubay ang gihisgutan sa mga balita nga posibleng modagan alang sa pagka presidente karong 2022. Apan alang kanako, tulo kanila ang seryuso ug klarong molahos sa paglansar.
Naa may moingon nga dunay posibilidad nga dili. Apan basi sa akong mga tinubdan sa Syudad sa Davao, sigurado nang modagan si Mayor Inday Sara Duterte-Carpio. Gani, makaingon ko nga siya ang leading karon sa mga presidentiables.
Nganong leading? Kay naa kaniya ang suporta sa iyang amahan nga si Presidente Rodrigo Roa Duterte. Gani, si Inday Sara man ang nakabali sa hangin diha sa Kongreso gikan kang kanhi speaker Alan Peter Cayetano ngadto kang Speaker Lord Velasco.
Laing presidentiable mao si Bise Presidente Leni Robredo. Nakaingon ko nga klaro kini si Robredo kay hangtod karon, anaa kaniya ang labing grabing pagbunal sa mga pagsaway gikan sa administrasyon, sa mga DDS kun Duterte Diehard Squad, ug kang Presidente Duterte mismo.
Masabot nimo nga si Robredo ang labing prominente nga lider sa mga kaatbang sa Presidente. Gawas nga siya ang bise presidente, nahimong aktibo kini siya.
Moguwa karon nga si Robredo ang anti-thesis mismo ni Presidente Duterte. Samtang bastos kini si Digong, si Robredo desente kaayo.
Bisan manubag si Robredo, makaingon ko nga dunay GMRC kun “good manners and right conduct.” Si Digong kay magpakita man gyud nga siya sipat. Di lang gani sipat mahitungod og babaye, garbo gani niya ang iyang pagkabastos.
Karong dunay pandemic ug mga sunod-sunod nga bagyo, si Robredo ang klarong nisunod sa mga science-based nga buluhaton. Ambot kon unsay nasulod sa ulo sa Presidente dihang niingon kini nga pwede manghunaw og gasolina.
Dugay na ko nakadungog nga dunay plano, apan mas nituo ko nga tininuod kining kang Sen. Manny Pacquiao nga modagan pagka presidente.
Ubay-ubay gyud sa middle class nga dili mobelib sa senador isip mag president, apan wala siya mangatik kon moingon nga gikan siya sa mga kabus. Gani, sa wala pa ang istorya nga modagan siya, sigi man kining manghatag ngadto sa mga kabus.
Gani, nailhan siya didto sa General Santos City nga manghatag inig pauli niya nga daugan sa boksing. Mao nga karon, walay mosaway kaniya nga manghatag og linibo sa mga bakwit og bagyo. Ang gihimong isyo batok kaniya mao ang social distancing.
Nakaingon ko nga seryuso siyang modagan karong nakuha niya ang suporta sa mga Ayala isip endorser sa Globe Telecom. Dayon, niingon ang senador nga ang iyang makuha nga kaayohan sa maong endorsement, iya ihatag isip hinabang sa mga bakwit sa bagyo.
Karon, nisugod nag tumaw ang usa ka kalihokan alang sa iyang pagka presidente.
Kining tulo, si Inday Sara, Leni, ug Pacman, mao ang nakita nako nga mga seryusong mga presidentiable alang sa 2022. (@anol_cebu sa Twitter)