Nasignit sa National Bureau of Investigation (NBI) National Capital Region ang usa sa mga suspek sa pagpatay kang Atty. Joey Luis Wee didto sa Laguna niadtong Martes. Anaa na sa kustodiya sa NBI 7 ang suspek nga si Fausto Edgardo Peralta nga taga Laguna. Gitumbok siya sa mga saksi, labi pa sa asawa ni Wee, nga maoy usa sa mga mamumuno. Kuyog ang asawa ni Wee sa dihang gipusil ang abogado sa hagdanan sa building sa iyang buhatan sa Barangay Kasambagan niadtong Nobiyembre 23.
Matod pa sa mga saksi ug base mismo sa CCTV footage, lima ka mga tawo ang nagpatay kang Atty. Wee. Nailhan na ang uban ug gipangita na karon sa mga tinugyanan sa balaod.
Gipasakaan na og kaso sa NBI si Peralta ug ang iyang mga kauban. Lig-on ang ilang mga ebedensiya-positive identification, electronic ug documentary evidences ang gihuptan sa NBI.
Okey, dili kita mokuwestiyon sa dagan sa imbestigasyon sa NBI kay sila man maoy eksperto sa investigation. Apan dili ba kaha motumaw ang kontrobersiya tali sa NBI ug Cebu City Police Office (CCPO) nga mohimo usab og ilang kaugalingong imbestigasyon sa maong kaso? Gisubli-subli ni NBI 7 Regional Director Renan Agustus Oliva nga dili kini contest tali sa NBI ug sa kapulisan. Mao usab kini ang pamahayag ni CCPO Director Col. Josefino Ligan, nga magtibangay sila sa pagsulbad sa kaso ni Wee. Collaboration ug dili contest, matod pa ni Oliva
O, lagi. Pero pila na ka higayon nga ang NBI ug kapulisan nag-inilugay sa kredito sa pagsulbad sa mga krimen. Kon nahinumdum mo niadtong Christine Silawan case sa Lapu-Lapu City mga duha ka tuig na ang nakalabay, si Christine, 16 anyos, nakit-ang patay ug natusak-tusak ang lawas sa dinunggaban. Dili ba lain man ang gisignit sa taga NBI nga suspek sa maong krimen? Unya lain pod ang sa pulis. Hangtod nga dunay nisurender ug niangkon sa krimen?
Pero ang atong gustong mahibaw-an mao gyud ang mastermind ning maong krimen sa pagpatay kang Wee. Kinsa man gyud ang tawo o mga tawo nga nagpapatay kang Wee ug unsa man ang motibo? Kon walay mokanta o mobutyag sa mga suspek kinsa ang nagsugo ug nagbayad nila, dili gyud masulbad sa hingpit ang krimen. Matangtangan kaha sa maskara ang mastermind?