NASIKOP sa entrapment operation sa Biyernes, Disyembre 11, sa mga awtoridad ang usa ka giingong vlogger nga giakusahang namaligya og hulagway ug video sa usa ka menor de edad nga lalake sa social media.
Gireklamo ang vlogger sa mga ginikanan sa 17 anyos nga lalake nga taga dakbayan sa Lapu-Lapu sa pagbutang sa hubo nga video ug hulagway sa social media nga giingong iyang ipamaligya sa mga customer nga ganahan.
Matod ni Police Lieutenant Galil Aiza Nacario, hepe sa Women and Children’s Protection Desk (WCPD) sa Cebu City Police Office, nga unang nireklamo ang mga ginikanan sa Lapu-Lapu City Police Office batok sa suspek nga giilang si Juvan Lloyd Tumlos, 30, taga Ucma Village, Dicol Residence sa Barangay Lahug, Siyudad sa Sugbo.
Human masuta nga taga Dakbayan sa Sugbo si Tumlos, gi-refer sila sa LCPO sa CCPO.
Matod ni Nacario nga nakit-an sa mga ginikanan sa menor ang hubo nga hulagway ug video sa ilang anak sa usa ka social media site.
Nagpatabang sila sa kapulisan nga mailhan kinsa ang ni-upload niini sa internet.
Unang nasayod ang 17 anyos sa iyang hulagway human ang iyang usa ka higala nisulti kaniya nga naa ang iyang hulagway nga hubo sa social media site.
Nisumbong gilayon ang menor sa iyang mga ginikanan.
Dihang nasuta nila ni Nacario nga si Tumlos ang ni-upload ug namaligya, nipatabang sila sa usa ka pamilya nga suod sa banay sa biktima nga magpaka aron ingnon nga buyer sa mga hulagway ug video.
Ila dayon nga giandam ang entrapment operation inabagan sa Department of Social Welfare and Services (DSWS) ug Inter-Agency Council Against Trafficking (IACAT) sa Biyernes sa alas 7:40 sa gabii, Disyembre 11, sa Salinas Drive, Lahug, Dakbayan sa Sugbo.
Gamit ang budol money, ilang gipalitan si Tumlos sa hubo nga video ug hulagway ug dihang nitunol na, gidakop gilayon siya nila ni Police Chief Master Sergeant Federico Tupas ug Police Staff Sergeant Epifanio Comedido Jr.
Nakuha gikan kang Tumlos ang upat ka tag P500 nga papel de bangko nga dunay ultra violet dusting, usa ka Iphone 7, identification (ID) card sa kompaniya, passport, duha ka tag P100 nga papel de bangko, P20, charger ug pink belt bag.
Matod ni Nacario nga ang menor de edad nitug-an nga nagkaila sila ni Tumlos niadtong tunga-tunga ning tuiga.
Ni-chat kini kaniya ug nihangyo kon mahimo bang maghubo ug mo-perform og sexual act.
Bugti niini ang bayad nga P2,000 ngadto sa P4,000 agad sa sexual act sama sa pagduwa sa kinatawo.
Matod ni Nacario nga ang batan-on bayran pinaagi sa usa ka electronic app, apan wa siya masayod nga gikuhaan og video ug hulagway ni Tumlos.
Human sa entrapment, ang 17 anyos gitugyan ngadto sa DSWS samtang si Tumlos gidala sa buhatan sa WCPD ug gibalhug sa custodial facility sa CCPO sa Camp Sotero Cabahug.
Si Tumlos pasakaaan og kasong kalapasan sa Section 4 (a) sa Republic Act 9208 as amended by Republic Act 10364 kun Expanded Trafficking in Person Act.