Pormal na nga gibuksan ni Philippine Sports Commission (PSC) Commissioner Ramon “El Presidente” Fernandez ang iyang bag-o nga negosyo nga mao ang pag-luto ug pag-deliver og lechon.
Usa sa mga bisita ni Fernandez sa pagbukas sa iyang negosyo mao ang national team athletes nga si Mary Joy Tabal, Margielyn Didal, sport personalities ug sportswriters didto sa iyang lechon house—Lechon ni El Presidente—sa Consolacion, Cebu.
Matod ni Fernandez nga dugay na niya nga giplano ang pagbuhat og lechon business. Ang iyang sekreto sa lechon mao ang family recipe nga ilang gigamit sulod na sa 50 ka tuig.
“Gadako ko sa Maasin naa mi baboy didto unya mag lechon mi. Naa gyud mi recipe og sangkap nga gamiton. Mao ni ang atong gigamit karon sa atong lechon,” padayag ni Fernandez.
Ang Sugbuanong basketbolista, usa sa mga top players of all-time sa PBA diin nakabulsa kini og 19 ka kampiyonato sulod sa iyang 22 ka seasons sa PBA. Human sa iyang karera sa PBA daghan og gisudlan nga negosyo si Fernandez. Siya pud ang kasamtangang comissioner sa PSC.
“Makatabang pud ni ang akong negosyo sa gagmay nga poulty diri sa Cebu kay mo-kuha man ta nila para sa atong e-lechon.”
Si Fernandez misikat sa basketbol niadtong dekada 80 ug 90 sa PBA.
Siya ang usa sa mga bituon sa Toyota (1973-1984), beer Hausen/ Manila Beer (1984-1985), Tanduay Rhum Makers (1985-1987), Purefoods Hotdogs (1988) ug San Miguel Beermen (1988-1994). Nahimong 19-time champion si Fernandez ug midaog pud og Most Valuable Player (MVP) award sa tuig 1982, 1984, 1986 ug 1988.
Si Fernandez mao ang PBA All-time leader sa career scoring, total reobunds, blocks, made free throws ug career minutes. Miyembro pud siya sa PBA 10,000-point club ug usa sa PBA’s 25 Greatest Players of All-Time.
Ang iyang No. 19 jersey giretiro na sa San Miguel Beermen.
Ang Olympian nga si Tabal miingon nga angay gyud matilawan ang Lechon ni El Presidente.
“Lahi ra gyud ang lasa sa maong lechon og makapangita gyud sa kalami,” matod sa 6-time Milo Marathon ug 2017 Southeast Asian (SEA) Games gold medalist nga si Tabal.
Mahimong mo-order sa lechon pinaagi sa pag-contact sa ilang Facebook page. (RSC)