HUMAN nasikop ang giingong drug queen nga nagbase sa lungsod sa San Fernando sa miaging semana, ang kapulisan sa lungsod nilusad sa sunodsunod nga drug-bust hinungdan sa kamatayon sa duha ka mga pusher nga gikatahong misukol sa awtoridad.
Niadtong Dominggo, Disyembre 13, alas 11:30 sa buntag, ang giila sa kapulisan ang high value individual (HVI) sa pagpayuhot og gidiling drugas, napusilan-patay human nikagar ang armas niini atol sa buy-bust sa Barangay Lower Pitalo.
Si John Mark Geraldiz alias ‘Badong’, hingkod ang panuigon ug nagpuyo sa naasoy nga dapit, gideklarar nga dead on arrival (DOA) sa tambalanan sa dakbayan sa Carcar.
Si Police Captain Janus Giangan, hepe sa San Fernando Police Station, maoy nangulo sa operasyon.
Ang mga sakop sa kapulisan sa San Fernando mipalit kini og usa ka putos nga shabu nga balor og P300 ngadto kang Geraldiz, apan nakabantay kini nga police decoy ang nipalit hinungdan nga nibunot kini sa iyang .38 nga armas apan nikagar.
Narekuber sa kapulisan ang usa ka gamay nga putos, usa ka medium, 30 ka gagmayng putos, usa ka .38 revolver nga dunay 3 ka bala nga mikagar ug bala, P300 buy-bust money, ug P590 nga halin sa druga. Ang drugas mitimbang sa 6.86 gramos ug mobalor sa P46,648.
Niadtong Sabado, Disyembre 12, alas 11:45 sa buntag, unang napatay sa kapulisan sa San Fernando si Joseph Villacorta Ensina, 22, ulitawo, taga Barangay Cabatbatan, diin gideklarar usab nga DOA sa mga doktor sa tambalanan.
Si Ensina gipalitag usa ka putos nga shabu balor sa P300.
Dihang nakabantay nga pulis ang iyang gika-transact, mibunot kini sa iyang giluklok nga .38 revolver, apan naunhan sa mga operatiba ug naigo sa iyang lawas.
Nakarekuber gikan sa crime scene sa posisyon sa suspek mao ang 22 ka pakite nga shabu.