Nadela: Manghatag og pinaskuhan bisan may pandemya

Pasko sa miaging tuig halandumon kaayo alang sa akong pamilya. Upat ka adlaw sa wala pa ang adlaw sa Pasko, malampuson nga napahigayon ang usa ka kritikal nga operasyon sa akong asawa nga nag-antos sa sakit sa iyang thyroid. Abi man nako og mamasko mi sulod sa tambalanan. Duha ka adlaw sa wala pa ang Pasko, gihatagan na siya og release order sa iyang doktor og tugob sa kalipay nga among gisaulog ang pagkatawo sa Batang Jesus kauban ang tibuok pamilya.

May mga gidili man tuod kay gipailawom man siya sa radiation, pero bintaha nalang kay naa naman siya sa usa ka kwarto sa balay nga nagsilbi niya nga isolation room. Sa ato pa, sa wala pa ang pandemiya si misis una na nga nakasinati unsa ning kinabuhi nga itanggong sa usa ka lawak sa balay sulod sa usa ka bulan. Ang pasidaan nga makadaut sa panglawas sa mga miyembro sa pamilya nga magpaduol sa pasyente nga moagi og radiation.

Bisan pa man sa maong sitwasyon gipugos namo ang among kaugalingon sa pag-ambit sa diwa sa Pasko. Haw-ang nga may usa ka miyembro sa pamilya nga nag-inusara ra sa lawak samtang nag-aso-aso ang fireworks sa pagsugat sa Pasko. Gipaambit ko ning maong kasinatian kay nasayod ko nga dunay daghan sa atong mga kapamilya ang may susama nga sitwasyon ning panahon sa Pasko.

Dili man siguro grabe ang kondisyon sa panglawas sa ilang mga pasyente, apan ang uban ilabi na niadtong nataptan sa Covid-19, sakit hunahunaon kay kon wa pay release order, mabuwag sila sa ilang pamilya ning panahon sa Pasko. Ang pait kay dili sab sila mahimong duawon sa tambalanan.

Mga pag-ampo ang gikinahanglan nga ning panahon sa Pasko unta ang pinakabililhon nga gasa nga madawat mao ang kaayohan sa mga nagpositibo sa Covid-19 ug ubang balatian nga nasinati sa ubang pasyente. Sa mga naa pa sa tambalanan unta may milagrong mahitabo alang sa inyong daling pagka ayo aron sa inyong tagsa tagsa ka panimalay kamo makasaulog sa Pasko.

* * *

Naghisgut man ta og pinaskuhan, naa pa ang mga kalihukan ning panahon sa pasko diin may mga tawo nga magsuroysuroy aron manghatag og pinaskohan? Di ba sa miaging tuig ug sa nangagi pa gyung mga Pasko, may mga pulis nga mamara og mga dyip aron manghatag og pinaskuhan sa mga daryber?

Ang drayber magduhaduha man gani kay nagtuo nga siya dakpon unya diay to hatagan og pinaskohan sa mga pulis. Duna sab koy nakit-an nga sakyanan nga nanghatag og hamburger sa mga libod-suroy nga bata sa may Fuente Osmeña Circle. Ang uban mga lamian nga pagkaon ang itunol sa mga igsuon nato nga naa ra sa aseras nangligdas.

Pagka tam-is handumon ang mga Pasko nga nanglabay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph