Gibanabana nga kapin sa usa ka gatos ka milyon ka mga Pilipino ang mabakunahan batok sa coronavirus disease 2019 (Covid-19) kon ang bakuna nga paliton sa gobyerno mobalor og tag P600 matag usa.
Si Senador Sonny Angara niingon nga nigahin ang Kongreso og P72.5 bilyones sa 2021 budget alang sa pagpalit og bakuna batok sa Covid-19. Pun-an sa gahin sa Bayanihan to Recover as One Act (Bayanihan 2) nga P10 bilyones, moabot ni sa P82.5 bilyones.
Apan mora’g tinamban ang kwentada ni Angara, chairman sa Senate committee on finance, kay imported baya ang bakuna. Di na molupad lang og iya paingon sa Pilipinas. Kon moabot man, kanus-a pa? Asa man ibutang kay ang ubang bakuna ra ba kinahanglan nga ang storage below zero Centigrade?
* * *
Apan klaro na gyud kaha ang budget alang sa pagpalit og bakuna batok sa Covid-19 nga gisukip sa P4.5 trilyones nga General Appropriations Act sa 2021 nga giratipikahan sa House of Representatives ug sa Senado niadtong Miyerkules, Disyembre 9, 2020?
Si Senate Minority Leader Franklin Drilon niingon nga sa P72.5 bilyones nga gigahin alang sa pagpalit og bakuna batok sa Covid-19, P2.5 bilyones lang ang gibutang ubos sa regular budget sa Department of Health (DOH). Ang P70 bilyones gibutang ubos sa unprogrammed funds.
Unsa man kining unprogrammed funds? Matod pa ni Drilon, sama kini sa tseke nga giisyu pero way pundo sa bangko. “It is like we issue a check without adequate funding. We hope it will not bounce,” matod ni Drilon.
* * *
Sa ato nang giingon dinhi, ang mga adunahan nga mga nasod mao gyud ang mag-una og palit ug paggamit sa bakuna batok sa Covid-19. Niadtong Martes, Disyembre 8, 2020, nagsugod ang pagpangbakuna sa unang 800,000 ka mga tawo didto sa United Kingdom ug gipaabot nga moabot ni sa upat ka milyon inig tapos ning buwana.
Apan wa damha nga maapil ang Pilipinas sa makasaysayanong hitabo sa UK kay ang nag-inject sa labing unang bakuna sa labing unang gibakunahan batok sa Covid-19 usa man ka Pilipina.