KADTONG wa pa makasulay og Covid-19, ayaw na lang gyod mo'g handom nga makasulay pa. Kung mahimo, likayi nang daan nga matakdan niining sakit nga bisan duna nay bakuna, grabe ang epekto sa lawas sa tawo.
Makasulti ko ani tungod kay naigo sab ko sa Covid niadtong Nobyembre 29. Sa hapon sa Nobyembre 28 nabasa ako sa ulan ug sa sunod adlaw, morag naa nay trangkaso ang akong gibati.
Niana pung adlawa, nagsakit ang ulo sa akong asawa nga usa ka health frontliner. Duha ka adlaw sila sa Paquibato sa usa ka evaluation sa mga Barangay Nutrition Scholar ug sa paghiabot nila sa syudad sakay sa sakyanan sa City Health Office, naunsa man nga silang tanan gibati ma'g panakit sa ulo.
Wala lang kini nila panumbalinga kay basin ang layo nga biyahe maoy hinungdan. Gihilot ko pa ang akong asawa og ignon niya nga morag naa siyay ubo nga dili mogawas.
Pagkasunod adlaw, medyo nawala ang iyang sakit sa ulo apan sakit na sab ang iyang tiyan ug nawala ang iyang panglasa og sa pangsimhot nga mga sinyales sa Covid-19.
Tuod man kadtong niuban sa Paquibato nga taga City Health gi-schedule nga ipailawom sa swab test. Ang usa nila ka kauban nagpa-swab nang daan og kay dali ra man niguwa ang resulta, nasuta nga positive siya sa Covid.
Hasta ang hepe sa ilang division nag-positive usab, busa niadtong Disyembre 4, silang tanan nagpa-swab test. Ang nakaparat lang kay hastang dugaya niguwa ang ilang resulta nga niabot pa'g pito ka adlaw.
Tungod niini, gikuha gidayon siya sa ambulansya aron i-isolate sa usa ka hotel sa syudad. Kami sa tibuok pamilya gi-schedule sab nga ipailawom sa swab test. Gawas kanako nga may simtomas sa pag-uga sa tutunlan, kapoy ang lawas, panakit sa ulo ug nawala ang panimaho ug panglasa, ang duha nako ka mga anak walay mga simtomas nga natakdan.
Sa pagkatinuod, dili lalim ang matakdan. Abi nako nga ordinaryong "tonsillitis" lang ang akong gibati tungod sa hataas nga hilanat, ubo nga walay plema ug sakit itulon. Busa tanang tambal sa tonsillitis ug sakit sa ulo ang akoa nang gitumar aron maayo.
Maglisod ako pagkatulog kay init ang lawas ug maglisod ko'g ginhawa kay morag naay nagbara nga plema ang akong dughan. Gisulayan ko pud og inom sa Traditional Chinese Medicine nga ako nang nasulat dinhi, nagtuob makaduha matag adlaw, pag-inom og Vitamin C ug daghan pang haplas.
Tuod man, pagka-10 ka adlaw, morag nawala ang tanan nakong dautang gibati. Mibalik na sa normal ang akong panglasa og pagsimhot ug wala na sab ang hilanat. Nakaingon ko nga "praise the Lord" kay nakalabang ko sa dakong pagsuway sa akong kinabuhi.
Ang tanang tambal nga akong giinom ug tambag ug pag-ampo gikan sa mga higala mao gayoy nakapaayo kanamo. Karong semanaha ipailawom kami sa swab test ug manghinaut kami nga negatibo ang resulta niini.
Amo diay'ng ipadangat ang among kasubo sa kamatayon sa among suod nga higala nga si Eunice Bandiola Casiple niadtong hapon sa Dominggo. Malinawong pagpanaw Nice.