DI MATUKIB ang gibating kalipay sa mga miyembro sa duha ka mga asosasyon sa kababainhan sa managlahing barangay sa Paquibato District, siyudad sa Davao human makadawat og P600,000 kantidad sa gamit pangnegusyo gikan sa Department of Labor and Employment (DOLE)-Davao.
Ang maong katikaran gipasayon sa 89th Infantry "Makatao" Battalion sa 10th Infantry Division didto sa mga barangay sa Colosas ug Tapak.
Ang Colosas Cook Baker and Women's Association (Cocobawa) nakadawat og P335,276.61 (79 percent) gikan sa ahensiya kon diin nakatampo kini og (21 percent) og P87,686 sa kinatibuk-ang proyektong galastuhan nga P422,962.61.
Ang Tapak Bread and Pastry Women's Association (TBPWA) nakadawat og 67 percent sa P499,812.61 kinatibuk-ang project cost kantidad og P335,326.61 kon diin nakatampo kini og (33 percent) P164,486 nga nagdala sa kinatibuk-ang project cost sa duha ka mga panaderya ngadto sa P922,775.22.
Ang lokal nga panggamhanan nidonar sab og duha ka motorsiklo nga magamit sa mga panaderya sa paghatud sa ilang mga tinapay aron palapdan pa ang ilang operasyon.
Mapasalamaton si Barangay Colasas Kapitan Antonio Bellera kang Mayor Sara Duterte-Carpio, sa ahensiya ug sa kasundalohan sa ilang Community Support Program sa mga hilit nga lugar sa dakbayan.
Tumong sa ahensiya sa maong livelihood programs aron makubsan pa ang kagutom sa katilingban.
Samtang si Joycie Latawan, presidente sa TBPWA, nagdayeg sa programa sa Makatao Battalion sa Tapak ilabi na sa pagmugna og lehitimong mga tulunghaan ug mga proyektong pangdalan.
Mapasalamaton sab si Amie Fel Cardente, presidente sa Cocobawa, sa maong katikaran.
Gidayeg sab ni 1003rd Brigade Commander Nolasco Mempin ang paningkamot sa kanhi Makatao Battalion commander nga si Lieutenant Colonel Silas Trasmontero sa maong inisyatibo nga nakapahimulos ang komunidad, uban sa tabang sa mayor, ug mga pribadong sektor alang sa kaamgohan sa livelihood program sa duha ka mga barangay. (WGM)