PORMAL nang gipaila-ila ang Cebuanang si Aida Patana sa usa ka press conference sa BBQ Break Pureza branch sa Sta. Mesa, Manila niadtong Disyembre 5 human siya napili nga maoy ipada sa Mrs. Tourism Ambassador Universe nga ipahigayon sa Kota Kinabalu, Malaysia sa February 2021.
Matod ni Rodell Salvador, ang national director sa maong pageant, nga ilang napili si Patana nga maoy mo-represent sa Pilipinas tungod sa talagsaon niining disposisyon ug determinasyon sa kinabuhi.
Si Aida gikatakdang ipaubos sa hugot nga training labi na sa question-and-answer. Ang sikat nga Cebuano fashion designer nga si Cary Santiago ang gitahasan nga maoy modisenyo lakip na sa iyang national costume ug evening gown.
Si Santiago mao usab ang nidisenyo sa evening gown ni Patana dihang niapil siya sa 2019 Mrs. World Philippines pageant sa Paris, France diin nidaug siyang first runner-up.
Lakip sa mga titulong ilogan sa Mrs. Tourism Ambassador pageants mao ang Mrs. Tourism Ambassador Universe, Mrs. Tourism Ambassador World, ug Mrs. Tourism Ambassador International.
Ang gisundan ni Patana nga si Myla Tsutaichi ang nidaug sa miaging tuig sa Mrs. Tourism Ambassador International crown.
“We’re not going there for sightseeing. We have to send someone who can win, and win big,” deklarar pa ni Salvador nga napatik sa Inquirer.
Ang 47-anyos nga si Patana nisaad nga iyang ihatag ang tanan niyang makaya aron magsilbi siyang inspirasyon sa mga sama niyang single mom sanglit wala kunoy imposible basta maningkamot lang ug di magpadaug sa mga problema.
Ang Malaysian organizers giingong dili na mo-require pa ni Patana og two-week quarantine. Ang pageant modagan gikan Feb. 1 to 7 samtang ang coronation night sa Feb. 6.
Lakip sa gipangutana sa mga sakop sa press sa Manila kang Patana mao ang malisyusong chika bahin nila sa aktor nga si Daniel Matsunaga. Apan bisan si Matsunaga nakakatawa ra sa maong tsismis nga long-time family friend diay ni Aida.