Nangandam na ang mga opisyales sa Barangay Tabok, Dakbayan sa Mandaue sa ilang barangay gym nga usa sa himuong satellite venue sa Misa de Gallo, karong Disyembre 16, 2020.
Gipahibawo sa Our Lady of Fatima Church sa ilang Facebook page nga mopahigayon og Misa de Gallo sa Barangay Tabok gym.
Matod ni Barangay Kapitan Dario Tarriman nga dili kini ang unang tuig nga ipahigayon ang Misa de Gallo sa ilang gym sanglit mao na kini ilang naandan sa miaging tulo ka tuig.
Sa mga milabayng tuig, ang ilang barangay gym mapuno ug aduna pay mutambong sa gawas sa gym, matod ni Tarriman.
Nipasabot si Tarriman nga ang ilang barangay adunay gilay-on nga tulo ngadto sa upat ka kilometro paingon sa ilang parokya, ang Our Lady of Fatima Church, Barangay Basak.
Aron matuman ang social distancing sa gym, gilimitahan nila og 400 ka mga tawo ang mamahimong makatambong sa misa de gallo sud sa barangay gym.
Giawhag ni Tarriman ang mga lumulupyo nga kon mahimo motan-aw sa live stream sa Facebook live aron nga dili maghuot sa gym.
Apan, giklaro niya nga anaa ra sab ilang mga barangay tanod nga mopatuman sa health protocol ug pagtuman sa “One Entrance, One Exit” nga paagi.
Sa laing bahin, sigon ni Felix Suico Jr., operations head sa Mandaue City Disaster Risk Reduction Management Office (CDRRMO) nga tungod nagkuwang ang ambulansya sa dakbayan sa Mandaue, mag-atang lang og 20 minutos ang ilang ambulansya sa usa ka simbahan una moadto sa laing simbahan ug pabalik.
Matod ni Suico nga dili kini susama kaniadto nga ang walo ka parokya sa Mandaue City tagsaan og ambulansya.
Gawas sa mga ambulansya, matod ni Suico, aduna sab sila duha ka roving medics nga magtuyok sa dakbayan. / KFD