GIKALUHA-AN og demalas ang barangay tanod sa Basak San Nicolas, Dakbayan sa Sugbo kay wa makuha ang P2 milyones diha sa buhatan sa treasurer, nagmantinil nalang og sinsiyo ug nadakpan pa gyud.
Giila ni Police Executive Master Sergeant Jeffrey Larobis, chief investigator sa Mambaling Police, ang dinakpan nga si Franklin Gerat alyas Pangkoy, hingkod, nagpuyo sa Sityo Cyco, Barangay San Nicolas.
Positibo nga giila si Gerat sa iyang kaubang tanod nga maoy niguba sa CCTV camera sa barangay hall.
“Na-record pa man ang katapusang mga lihok sa atong suspek una pa niini putla ang wire sa CCTV camera mao to nga nailhan siya,” matod pa ni Larrobis.
NADISKUBREHAN
Ang janitor sa barangay nga si Aurea Alkuino maoy unang nakamatikod sa guba nga pultahan sa buhatan sa barangay treasurer, diin adunay silsil ang kilid ug giligwatan.
Dali nga gipahibawo ni Alkuino ang mga opisyal sa barangay ug mirespondi sab ang personnel gikan sa Mambaling Police Station.
Nahuwasan si Veronica Monleon, barangay treasurer, sa iyang pagkasayod nga pakyas ang kawatan sa pag-abli sa ilang vault.
BONUS
Ang P2 milyones nga diha sa vault gitagana alang sa Christmas bonus sa barangay officials ug workers.
“Ambot nalang og kon nakuha pa ang P2 milyon unsa nalang kaha akong buhaton kadako atong kuwartaha, wa koy ikatapal,” kabalaka ni Monleon.
Bugtong nadala ni Gerat mao ang mga hinipos nga sinsiyo nga tag-P10 ug P5 diha sa drawer sa lamesa sa treasurer nga mokabat sa P2,500.
Si Gerat nasikop sa balay sa iyang asawa sa Barangay Pooc, Talisay City.
MISIS GIBASOL
Gikatahong giangkon ni Gerat ang pagpanglungkab ug sumala pa naboryong ang iyang huna-huna sa dihang ang iyang asawa nagpunay og yawyaw sa pagpangayo kaniya og kuwarta sa higayon siya mopauli sa ilaha.
Si Giovannie Tabada, barangay konsehal, nagkanayon nga ilang pasakaan og reklamo si Gerat sa dakong kadaot nga gihimo niini sa ilang barangay.