Nagsugod na og pang-apod-apod og bakuna batok sa Covid-19 didto sa Estados Unidos. Apan si Secretary Carlito Galvez Jr. nagkanayon nga kining mga bakuna moabot sa atong nasud sa tunga-tunga pa sa 2021.
Abi gyud nako og magkadungan-dungan kita sa ubang mga nasud kay sayo baya naghisgot si Presidente Rodrigo Duterte nga ang bakuna maoy iyang plano batok sa Covid-19.
Apan nagbasa ko sa pamahayag sa giingong vaccine czar nga si Sec. Galvez, nag-negosasyon pa diay ang kagamhanan alang sa bakuna sa China nga mao ang Sinovac. Moabot kini karong Marso. Nagnegosasyon sab kita sa AstraZeneca nga moabot karong Mayo. Ang kagamhanan nakignegosasyon sab sa Pfizer ug ang J & J.
Nagkanayon si Sec. Galvez nga kon pinirmahay karong Disyembre sa mga kompanya sa Estados Unidos ug ubang nasud sa Kasadpan, maghulat kita og mga unom ka bulang grace period aron sila makahimo sa atong order ug maka-deliver.
Nagpasalig si Sec. Galvez nga duna kitay mga 30 milyones ka mga dose gikan lang sa AstraZeneca. Kon malamposon ang negosasyon sa ubang kompaniya, moabot kita og 60 milyones ka mga doses.
Buot ipasabot, base sa gisulti ni Sec. Galvez, naa kitay bakuna alang sa sobra sa katunga sa atong populasyon.
Gawas nga kulang pa kini, nabalaka sab ko kay sa balita gikan sa Estados Unidos, naa man silay second dose kada tawo.
Sugbo
Nagkanayon sab si Sec. Galvez nga apil sa unang mabahinan sa bakuna mao ang Sugbo. Ang ubang mga dapit naglakip sa Metro Manila, Calabarzon, Syudad sa Davao, ug Cagayan de Oro.
Priority sab ang immunization sa Syudad sa Baguio, Iloilo, Zamboanga, Tacloban ug General Santos City.
Ang mga dapit nga dunay pasilidad alang sa cold chain maoy makadawat sa bakuna nga gikan sa Pfizer. Kadtong mga lalawigan nga way pasilidad alang sa cold chain, maoy makadawat sa mga bakuna sa gikan sa AstraZeneca ug Sinovac.
Ang bakuna nga gikan sa Pfizer posibleng anha iapo-apod sa kaulohan, sa Cebu, Davao, ug Cagayan de Oro.
Apan kay kulang man ang bakuna, mas maayong ipadaplin una ni Mayor Edgar Labella ug Bise Mayor Mike Rama kining ilang mga proyekto sama sa pagtukod sa Command Center ug pagpalit og mga bus.