NAWALA nga Android phone maoy hinungdan nga amahan gidunggab-patay sa iyang anak gabii sa Disyembre 14, 2020 sa Sityo Panas, Barangay Poog, Dakbayan sa Toledo.
Ang namatay giila nga si Robert Nadela, 58, truck driver. Ang suspek iya ra usab nga anak nga si Rodel, 34.
Asoy ni Police Staff Sargeant Alexander Consul, Toledo Police Station nga nagkalalis ang duha dihang gipukaw ni Robert si Rodel kay gipangitaan sa nawala nga cellular phone. Ang maong nawani nga cellphone gipanag-iya sa anak nga babaye ni Robert.
Giingong ang otso anyos nga anak ni Rodel gipasanginlan nga maoy nidala sa cell phone, apan hugtanon kining gipanghimakak sa bata.
NAALIMUNGAWAN
Si Rodel, sa iyang bahin sa dihang nahinabi sa Superbalita Cebu, nisaysay nga nahinanok na siya niadtong higayona uban sa iyang kapuyo ug tulo ka mga anak nga pulos menor de edad.
Nakamata siya sa pagpukaw sa iyang amahan nga naglungotlungot sa kasuko.
Gipangitaan si Rodel sa cellular phone nga iya sa iyang manghod babaye kay matod pa gidala sa anak ni Rodel.
Ang pasangil gihimakak sa bata, otso anyos nga lalake.
Nitambong ang pamilya ni Rodel sa birthday party sa iyang manghod babaye nianang sayong gabii dito sa Barangay Dumlog.
Apan wa sila nagdugay tungod kay nagsige og uwan niadtong higayona hinungdan nga namauli sila.
LALIS
Gihulagway nga nangisog si Robert nga misukmat ni Rodel nga niresulta sa init nga panaglalis.
Nikuha og baton si Robert nga gamiton sa paghapos, apan dali sab nga nikuha og kutsilyo si Rodel.
Taliwala sa gihimong pag-uwang ni Lourdes, asawa ni Robert ug mama ni Rodel, gihansak ni Rodel ang kutsilyo nga 10 pulgada ang gitas-on, sa nagkadaiyang bahin sa lawas sa iyang amahan.
“Nahadlok ko, Sir, nga patyon ko sa ako papa. Duna na baya siyay agi kaniadto unya nagdalag baton, mao na ako nalang gidunggab,” matod ni Rodel.
Sumala pa ni Rodel, nagtuo iyang papa nga mikonsentir siya sa iyang anak nga gipasanginlang nikuha sa cell phone.
“Naglagot ko, Sir, kay gusto ni Papa nga pagdisiplina sa akong anak sama nila kaniadto bitayon unya bunalan, pero dili nako na mahimo sa ako anak. Unya wala man sab mangawat amg bata,” sugilon ni Rodel.
NAGBASOL
Giangkon ni Rodel nga sangko sa langit ang iyang pagmahay sa iyang nahimo sa dihang iyang napatay ang iyang kaugalingong amahan.
Kasong parricide ang reklamo ang giandam batok ni Rodel. (GPL)