MAGSUGOD na ang Misa de Gallo. Tradisyon sa mga Katolikong deboto ang pagsaulog sa siyam ka adlaw nga Misa sa pagsugat sa adlaw sa Pasko gikan Disyembre 16-24.
Sanglit daghan ang nagtoo nga maghatag kini sa ilang mga gipangamuyo panahon sa Santos nga Misa, daghan gayod ang mosimba. Magdasok sa simbaham niadtong wala pa'y pandemya.
Luyo sa pandemya, padayon gihapong ipahigayon ang naandang Misa de Gallo nga misibo na sa tradisyon sa mga Pinoy. Magdasok sab sa simbahan diha sa misa sa pagsugat sa Bag-ong Tuig, apan may gipagula nga kamanduan ang Archdiocese of Davao labot niini.
Gipetsahan nga Nobyembre 22, sulod sa Pastoral Advisory, gikaingong tugutan ang misa apan anaa lang sa 30% ang kapasidad sa simbahan nga gipirmahan ni Archbishop Romulo G. Valles, arsobispo sa Davao.
Dugang ni Valles nga angay makauli na ang mga tawong manimba sa ilang balay una ang alas 9 sa gabii mao nga gihangyo niya ang pagpahigayon sa misa sa mas sayo nga oras diin wala na kadtong naandan nga kaadlawon.
Gidasig sab sa simbahan ang publiko nga padayong motuman sa mga health protocols ug angay nga sundon ang curfew hours.
Wala gyoy makapukan sa debosyon ug latid sa tradisyon, mag-ampo kita ning mga panahona aron maabagan kita nga makaluwas niining pandemya nga nagpalisod og samot sa kalibutan.
Unta mahimong dalan ang tim-os nga pagtuo ngadto sa paghaw-as nato sa kalisdanan uban sa pag-ampo nga kinasingkasing gayod.