KIDAPAWAN CITY -- Hugtanon nga gipanghimakak ni Magpet, North Cotabato Mayor Florinito Gonzaga nga siya usa sa mga nagprotekta sa small-scale mining ug illegal logging sa tiilan sa Mount Apo.
Una nga gipagawas ni Mindanao Development Authority (MinDa) Chairman Secretary Manny Piñol nga dunay ilegal nga pagmina ug pagpamutol sa kahoy sa Mount Apo protected area sa Barangay Don Panaca, Magpet, Cotabato.
Giingon nga dunay nagprotekta nga mga opisyal sa sundalo ug mga lokal opisyal.
Matud ni Mayor Gonzaga nga niadtong bulan pa sa Hulyo 2020 sila nakadawat og taho nga dunay small scale mining sa tiilan sa Mount Apo diin gipa-imbestigahan dayon niya sa DENR apan wala makita gumikan kadako sa kalasangan.
Subling gisusi sa LGU og DENR ang giingon nga ilegal nga pagmina uban ang tabang sa mga molupyo sa maong dapit diin ilang nadiskubre ang lawom nga tunnel.
Gipasara dayon kini ni Mayor Gonzaga ug Department of Environment and Natural Resources (DENR)-Soccsksargen.
Giklaro sa mayor nga dili sab tinuod nga dunay mga opisyal sa sundalo ang nagprotekta sa ilegal nga pagmina sa Barangay Don Panaca.
Migawas sab sa pag-imbestiga sa DENR nga si Barangay Don Panaca Kagawad Daniel Sauyan ang alegasyong utok sa small scale mining ug financier niya ang usa ka negusyante nga naggikan sa Tagum City sa nakita nila nga potensiyal nga gold ore deposit.
Ang nasampit nga kagawad wala pa nakapagawas og pamahayag s pagkalambigit sa iyang ngalan.
Sa kasamtangan, nagpadayon ang imbestigasyon sa LGU-Magpet uban ang DENR sa ilegal nga pagmina ug pagpamutol sa mga punuan sa kahoy sa Mount Apo protected area. (Edgar Fuerzas)