MOKABAT sa P1.4 milyon nga kantidad sa gituohang shabu ang nakumpiska sa mga personahe sa Philippine Drug Enforcement (PDEA) sa Davao Region sa usa ka lalaki nga nasignit nila atol sa buy-bust operation nga gihimo alas 10 sa buntag, Disyembre 15, 2020.
Gipangunahan sa PDEA-Davao Region, kaabag ang Tagum City Police Station ug Davao del Norte Provincial Police Office, ang maong operasyon nga miresulta sa pagkasikop sa ulitawong si Cris Silvester John Calapan alyas Jan-Jan, kinsa giingong licensed criminologist nga taga Visayan Village sa Tagum.
Ang suspek nakigtransaksiyon sa nagtakuban nga PDEA agent, diin nakuha kaniya ang balor P19,000 nga druga, apan dihang girekisa ang iyang sakyanan, misugat pa sa ilang mga mata ang mas daghang pakite sa shabu nga mitimbang og 110 gramos ug may street value nga P1,430,000.
Depensa sa suspek, gipadala lamang kaniya ug wa sila masayod nga shabu, apan ang kapulisan di motuo sanglit ang dinakpan mismo ang nakigsabot kanila nga siya mobaligya.
Sa kasamtangan, giproseso na ang kasong pagsupak sa Republic Act 9165 kun Comprehensive Dangerous Drugs Act of 2002 batok sa suspek didto sa korte.