HUMAN sa makabungog nga 2019 Pambansang Muziklaban Finals nga esklusibong gipagawas sa online, gikoronahan sa Red Horse Beer ang mga bag-ong kampiyon sa Pinoy rakenrol.
Ang “We The Dying” sa Iloilo City nga siyam na katuig isip banda ang nidaug sa kategoryang Lakas (hard rock) samtang ang “Pikaso and the Riots” nga naporma sa Batangas niadtong 2016 ang naghari sa kategoryang Aklas (alternative rock).
Ang duha ka grupo parehong nakadawat og P500,000 gikan sa Red Horse Beer ug dugang P25,000 gikan sa Macbeth. Ang kumpetisyon gipahigayon sa official Facebook page sa Red Horse Beer Muziklaban sud sa tulo ka mga Sabado (Nov. 21, 28 ug Dec. 5).
“This is our first time to join the Muziklaban and this is our first ever victory in a band competition,” pabuhagay pa sa We The Dying vocalist Jobs De Guzman sa online interbyu sa Superbalita Cebu. “We are planning to use the cash prize to upgrade our band gear and equipment.”
Atol sa finals unang gi-perform sa We The Dying ang “In defense of” sa Til Kingdom Come isip cover song ug ikaduha ang orihinal nilang komposisyon nga “Gyera” nga naghubit sa kabililhon sa kinabuhi.
PIKASO AND THE RIOTS
Ang Pikaso and The Riots sa Batangas una nang nisalmot sa 2017 Red Horse Muziklaban diin igo ra silang nakasud sa semi-finals. Ang kapildihan maoy naghatag nilag dugang rason aron moapil pagbalik sa karon nga season.
Atol sa finals unang gitukar nila ang Anakbayan cover nga “Pagbabalik ng Kwago” ug gisundan sa ilang original composition sa Red Horse nga “Kakampi.”
“Kami ho dine sa Batangas ay tinamaan din ho ng mga trahedya kaya malaking tulong areng aming napanalunan na makabangon at makatulong sa aming kanya-kanyang pamilya,” nagkanayon ang Batangenyong si Ron Alaras nga maoy bass guitarist sa online interview sa Superbalita Cebu.
Gawas sa pagbanda, ang Pikaso and The Riots puros dunay trabaho sa adlawan: si Ron isip bank officer; PJ Sevilla (vocals) service driver; Ernest Morales (guitars) call center agent; ug Daniel Samontañez (drummer) dunay negosyo.
‘ROCK STAR’
“Rock star by night and teacher by day” usab ang drama sa bokalista sa We The Dying nga si Jobs De Guzman isip guidance staff ug college professor sa usa sa mga kolehiyo sa Iloilo City.
Samtang ang iyang mga kauban nga silang Genesis Sarmiento (guitars), Shawn Tanteo (guitars), Keneth Cabaltica (bass) ug Merwayne Alamo (drums) puros naa sa BPO Industry.
Sa wa pa ang finals, ang “We The Dying” gitudloan sa Red Horse evangelist band nga Greyhoundz, samtang ang “Pikaso and The Riots” nitukar ubos sa paggiya sa bandang Slapshock.
Human sa awarding gihatagan og tribute sa Muziklaban ang namatayng bokalista sa Slapshock nga si Jamir Garcia nga nakapahimong emosyonal sa mga nanan-aw ug supporters.
“Yes, very grateful kami sa mentoring nila sa amin via zoom. Nakaka-proud at nakakataba ng puso masabihan kami ni Sir Jamir na equally talented kami at nagco-compliment sa isat-isa. Isa sa mga hindi namin makalimutan yung sinabi n’ya na ilabas ang energy sa stage, best performance at enjoy lang,” pagbalik-lantaw pa sa Pikaso and The Riots.
“For our performance in the grand finals Greyhoundz advised us to maintain the pacing and the energy of our songs from start to finish. Also to be confident, trust each other,” paambit usab sa We The Dying.
Nanukar usab sa maong online event ang sikat nga Pinoy bands nga Chicosci, Kjwan, Mayonnaise, Razorback, ug Wilabaliw. Samot nahimong “extra strong” ang `yugyugan’ tungod sa “Virtual Slaman” diin ang napiling Slamero of the Night nakadawat og mga pahalipay.
Ang mga bandang Pahina ug Molay, nga puros gikan sa Metro Manila, ang parehong nibulsa sa P50,000 cash isip pinakadaghan nga nakuhang “beer votes.”
Sa pagkakaron ang Pikaso and the Riots nangandam sa ilang live performance sa “In The Lair” sa Four Corners Musicians Lair FB page. Samtang ang We The Dying busy sa recording sa ilang kantang “Gyera” ug sa bag-o nilang mga komposisyon.
Kon unsay plano nila karong Pasko, “Just a simple gathering with our loved ones. In this time of pandemic nothing is more important than the safety of everyone.”