ANG mga sakop sa Philippine National Police (PNP), labi pa kadtong nadestino sa pagpatuman sa mga quarantine protocol sa mga lugar nga magtapok-tapok ang mga tawo, isyohan og rattan yardstick o yantok sa Tagalog. Olise o garute na dinhi sa ato nga gigamit sa mga eskrimador sa Doce Pares ni Grand Master Ciriaco “Cacoy” Canete. Mga pulis sa kaulohan naisyuhan na. Nia sab dinhi. Usa ka metros ang gitas-on sa bunal nga uway.
Matod pa sa mga opisyal sa kapulisan nga daghan kini og gamit. Una, masukod ang distansiya sa matag tawo kon adunay magtapok aron maobserbar ang social distancing. Ikaduha, depensa sa kapulisan batok sa gustong manakit kanila inay nga armas de fuego ang ilang gamiton. Ikatulo, aw, para bunal sa mga tawo nga gahi og ulo nga dili magpabadlong ug mosunod sa mga health protocol.
Morag mga pulis sa India ba nga mamunal sa mga tawo nga magpabadlong. Atong makita sa social media nga ang mga pulis sa India morag atong nanay kaniadto, bunalan tag silhig kon magpabadlong. Apan mialma ang taga Commission on Human Rights (CHR), mga militanteng grupo, labi pa ang mga batan-on kon gamiton sa pagbunal sa mga tawo nga magpabadlong. Bisan si Presidential Spokesman Harry Roque mipahimangno nga di kini angay gamiton sa kapulisan isip bunal.
So, para sukod ra gyud diay ni? O gamiton nga sungkod sa mga pulis? Unsa may pulos ani kon dili ni gamiton isip bunal, pagdisiplina sa mga tawo nga gahi og ulo? Dili baya lalim ang trabaho sa mga pulis sa pagbadlong sa mga masupakon sa balaod. Sumala og naay rally, usahay abusuhan lang sa mga raliyista ang mga pulis kay taming ra ang dala. Usahay, sila ma-over power sa mga demonstrador.
Kon para sukod lang, wala kaha ta mag-usik-usik og pundo para pagpalit ani unya dili gamiton? Mas maayo pa ni kay sa armas nga kon maapeki ang mga pulis, mamusil gyud. Dili na makasagop anang ‘maximum tolerance’. Dili man ni makapatay kon mamunal lang. Sa una bitaw, magdala og batuta ang kapulisan unya mamuspos man. Hinuon, sa una wala pa may human rights. Mosinggit dayon sila nga human rights violation ug ikiha dayon ang mga pulis. Maong daghan nang abusado.