Modagan ngadto sa unom ka teams ang nagpakita og interest nga mosalmot sa gipaabot nga VisMin Super Cup Basketball tournament nga gikatakdang sugdan sa bulan sa Marso, sunod tuig.
Samtang nagpadayon ang paghikay sa dokumento ug rekisitos alang sa maong tournament nga maoy pinakadakong basketball competition sa Visayas ug Mindanao, naobserbahan nga pipila usab ka mga basketball teams ang mipakita og kaandam sa ilang partisipasyon.
Ang teams sa Visayas mao ang Kiboy’s Computer Solution nga gipanag-iya ni Ricky Verdida nga posibling magrepresentar sa Mandaue City, We Drink team ni John Cabahug, Bogo City-Landmasters, Cebu City, Danao City-Valenzuela, Talisay City-ARQ ug Lapu-lapu City.
Si Chelito Caro, kinsa maoy coordinator sa Visayas leg, mitug-an nga subsub nga preparasyon ang ila karon gilihok diin naglakip niini ang negusasyon sa pagpasalida sa mga duwa sa Solar TV.
Ingon niya nga gawas sa television, makita usab ang mga duwa live pinaagi sa Facebook ug sa Youtube channel.
Niini, siya midugang nga mahatagan gayud og saktong exposure ang mga teams ilabi na kay sagupon sa format ang double-elimination round.
Ang top two human sa eliminasyon deretsong makakuha og luna alang sa semis samtang ang no. 3 ngadto sa no. 6 teams mao ang magkombati alang sa laing duha ka luna sa semifinals round.
“Modaghan pa gyud ang ilang exposure kon masulod sila sa semis ug sa finals. Hatagan nato sila og saktong exposure,” ni Caro pa. Samtang sa Mindanao leg, gipaabot usab nga labing minus upat ngadto sa lima ka teams ang moitsa sa ilang partisipasyon.
Sa sayong bahin, si Van Halen Parmis, ang Mindanao coordinator, nagkanayon nga hinayhinay na usab karon nga nangandam ang Mindanao teams alang sa maong liga.
Ang makampiyon sa Visayas ug sa Mindanao legs maoy mag-abot sa finals series.
Lakip sa nagpaluyo sa lega si Vino Guingona sa Mindanao ug ang businessman-sportsman nga si Michael Valenzona. / JBM