Dili ikalimod ang kasikat sa Isla sa Bantayan, lalawigan sa Sugbo kon nindot nga beach resorts ug lami-an nga buwad na ang hisgutan.
Lokal man o langyaw nga turista madani sa kanindot sa puting balas ug tin-aw nga dagat sa Lungsod sa Sta. Fe ug magpangita sa buwad sa Lungsod sa Bantayan aron ipasalubong sa pamilya, o mga higala.
Sa amihanang dapit sa isla nahimutang ang Lungsod sa Madridejos, duha ka dekada na nga naila ang lugar isip producer ug exporter sa unod sa kasag (crab meat) ug tulipsay (scallops).
Atol sa gipahigayong Suroy-Suroy Sugbo niadtong Nobiyembre 27-29, 2020, gipahibawo ni Madridejos Mayor Salvador Dela Fuente nga bukas ang SM Seafoods alang sa mga turista nga buot mosuway sa “plant tour.”
“Pwede ra gayud anytime. Mahibawo lang ang management namo diri pwede ra sila moari diri. Pahibawo lang sila,” matod ni Dela Fuente.
Sa maong tour, makita sa mga turista ang proseso sa pagkuha sa unod sa lambay ug tulipsay.
LAMBAY, SCALLOPS
Muabot sa duha ka tonelada nga crab meat matag adlaw ug 60,000 kilos matag buwan nga scallops ang ma-supply sa SM Seafoods kon peak season.
Human sa pagkuha sa unod sa lambay ug scallops, ibiyahe kini paingon sa Cordova, Cebu aron iproseso sa dili pa i-export sa Amerika.
“Diri lang gi-picking sa Madridejos. Dad-on ni siya didto sa Lungsod Cordova didto na ni siya i-pasteurize, i-canning,” matod ni Dela Fuente.
Mamahimo usab nga mamalit ang mga turista og preskong lambay sa P450 matag kilo ug scallops sa P180 matag kilo.
CONTACT
Sa mga buot mubisita sa planta sa SM Seafoods mamahimong makig-alayon sa Mayor’s Office sa lungsod o mokontak sa 0977-820-5998 ug pangitaa lang si Jiezel Ortega.
Walay bayad ang pagsulod sa pasilidad.
Alang sa mga turista nga buot musuroy sa Isla sa Bantayan siguradoha lang nga aduna moy roundtrip ticket sa barko, advanced hotel booking, ug quarantine pass.
ASA MAPALIT
Apan sa mga dili makaadto sa Madridejos, mamahimo gihapon nga matilawan ang lamian nga lambay, scallops, ug uban pang produkto sa SM Seafoods pinaagi sa pag-order sa Seabu nga nahimutang sa Sugbo Mercado sa IT Park sa Dakbayan sa Sugbo o ba kaha sa pag-order pinaagi sa mga food delivery app.
“Naa tay puwesto sa Cebu. Ang uban sad namo nga scallops amoa nang gi-half shell for local market. Naa tay local market sa Sugbo Mercado sa akong anak kanang Seabu,” matod ni Dela Fuente.
Kon makahigayon kamo og suroy sa Madridejos suyawi ninyo og duaw ang SM Seafoods plant aron sab nga madugangan ang inyong ka-alam sa maong matang sa pagkaon ingon man ang proseso sa paggama niini.