IKATULONG adlaw karon sa tradisyonal nga Misa de Gallo, nga molanat pa hangtod sa Disyembre 24 sa gabii. Base sa mga taho ug obserbasyon, daghan mga simbahan ang wala makatuman sa physical distancing sa mga manimbahay labi pa niadtong unang adlaw. Nagpunsisok o nagsugwak ang mga tawo labi pa sa gawas sa simbahan. Daan na gyud kong nag-ingon nga lisud kontrolahon ang nga manimbahay basta tugutan nang nagkatapok.
Kon modaghan man o mosaka ang mga kaso sa Covid 19 human sa Pasko, wala kitay laing basulon kon dili ang Inter-agency Task Force for the Management of Emerging Infectious Disease (IATF) nganong ilang gitugutan ang pagpahigayon sa Misa de Gallo. Kon ako lang unta ang pabut-on, angay kining kanselahon gumikan sa kabalaka nga mao kini unya ang hinungdan sa pagsaka sa Covid 19 cases.
Nganong wala man lang kini gipaagi sa virtual o online pinaagi sa social media ang misa? Way grasya kon dili kita mosimba personal sulod gyud sa simbahan? Bisan mismo ang Archbishop sa Manila, Broderick Pabillo, nagkanayon nga makasabot ra ang Ginoo ana kay ania man kita sa pandemya. Duna na kitay nga teknolohiya nga mo-back up niana.
Adunay mga pagtuon nga nagkanayon nga taliwala sa kapopular sa mga mobile communication ug social media, ang mga tawo nahimong mas socially isolated. Inay nga magkahiusa, nahimo na hinuong instrumento ang teknolohiya sa pagkabahin-bahin sa katawhan ug nakadugang sa iyang loneliness kun pagbatyag sa iyang pag-inusara.
Ug sa panahon sa pag-inusara, adunay pagbati sa kakuwang o kahaw-ang sa iyang kinabuhi, ug kadaghanan kanato modangop sa simbahan aron mag-ampo sa Ginoo aron katambalan ang kamingaw nga atong pagabation ug pangitaon diha sa simbahan ang presensiya sa Ginoo.
Adunay uban nagtuo nga ang aktuwal nga pagtambong sa misa sulod gyud sa simbahan mao ang labing husto nga pag-angkon sa presensiya sa Ginoo. Ang nakakuwang na lang mao ang atong awareness o kasayuran nga diay, anaa na kanato ang Ginoo sa tanang panahon ug bisan sa asang lugar. (bobbygnalzaro@gmail.com)