Namatay ang usa ka abogada nga sakop sa Public Attorney’s Office (PAO) human pusila sa riding in tandem alas 2:50 sa hapon sa Disyembre 17, 2020 sa highway sa Barangay Looc, Dakbayan sa Danao.
Si manlalaban Baby Maria Concepcion Landero-Ole, biyuda, taga Sitio Camaligbato, Brgy. Taboc, Dakbayan sa Danao, patay na pag-abot sa Cebu Provincial Hospital sa Danao City. Si Ole mao ang ikatulong manlalaban sa Sugbo nga gi-ambush sukad Oktubre 2020. Sa tulo, duha ang nangamatay.
Si Major Maria Theresa T. Macatangay, hepe sa Danao Police Station nga nahinabi sa Superbalita Cebu, nagkanayon nga gikan si OIe sa usa ka husay sa Regional Trial Court (RTC) sa Danao City isip sakop sa Public Attorneys Office (PAO) sa siyudad.
Padung siya sa lungsod sa Liloan aron mobayad sa tuition sa iyang anak nga nagtungha.
Siya ra usab ang nagmaneho sa iyang pick-up truck.
Sa iyang pag-abot sa dapit ug nihunong ang sakyanan, duha ka mga tawo nga nagsakay sa usa ka motorsiklo kalit nga nipusil kaniya.
Human sa pagpamusil, nipasirit pagpadagan paingon sa lungsod sa Compostela ang killers.
Dali siyang gidala sa ospital sa niresponding mga pulis, apan patay na ang abogada.Wa pa matino nila ni Macatangay kon diin naigo sa bala si Ole.
Si Macatangay nagkanayon nga wa silay matumbok nga motibo sa krimen.
Gabii sa Disyembre 16, 2020, nitambong pa siya og tigom sa Integrated Bar of the Philippines (IBP), matod ni Macatangay base sa mga impormasyon nga ilang nadawat.
Gihisgutan sa tigom ang mga pagpamatay sa mga abogado, ning bag-ohay lang, kang manlalaban Joey Luis Wee.
Si Wee gipusil patay dihang mosulod na unta sa iyang opisina Nobiyembre 23, 2020. Ang usa sa gitumbok nga gunman nasikop na sa National Bureau of Investigation (NBI) 7.
Oktubre 10, 2020, si manlalaban James Joseph Gupana gi-ambush sa Lapu-Lapu City, apan ni-survive.
Wa pay nakitang motibo si Macatangay sa pagpatay kang Ole.
Duna na silay nakuhang footage sa closed circuit television (CCTV) nga hayan makatabang sa pagsulbad.
Nag-target sila og 24 oras pagsulbad, apan kon di mahimo, manghangyo sila sa pagtukod og task force. Sanglit nagpadayon ilang imbestigasyon sa kaso.
Gibutyag niya nga si Ole, sa ilang nakuhang impormasyon, asawa ni Juanito Flores Ole, giingong drug lord ug ex-convict sa New Bilibid Prison (NBP).
Apan dihang nakagawas, gipusil patay sa terminal sa dakbayan sa Danao niadtong Mayo 26, 2020.