DAVAO DEL SUR -- Usa ang probinsiya ug Davao Occidental nga nakasinati og daut nga panahon sukad pa niadtong Lunes gumikan sa Low Pressure Area (LPA) dinhi sa Mindanao.
Huwebes sa hapon hangtud na sa pagkaadlawon kagahapon Biyernes, Disyembre 18, nagdulom ang kalangitan ug way puas ang pag-ulan.
Kini human nga niabiso ang Philippine Atmospheric, Geophysical and Astronomical Services Administration (Pagasa) nga nahimo nang tropical depression ang LPA ug gitawag kining Vicky, kon diin nasiplatan sa sidlakan-habagatang-sidlakan sa siyudad sa Davao.
Matud pa nga alas 4 sa kaadlawon kagahapon, si Vicky anaa sa 210 kilometro gikan sa sidlakan sa nahisgutang siyudad ug dala niini ang gikusgon sa hangin nga 45 kilometro matag oras.
Dakong bahin sa Mindanao ug Kabisay-an giulan tungod niini.
Si Vicky gilauman nga motugpa sa kayutaan sa Davao Oriental o Surigao del Sur sud sa 12 oras kagahapon.
Gitataw sa Pagasa nga posibleng mogawas na si Vicky sa Philippine Area of Responsibility (PAR) ugma, Dominggo sa gabii, Disyembre 20.
Daghang mga lugar ang gipailawom sa Tropical Cyclone Wind Signal number 1 nga mao ang mga probinsiya sa Davao City, Davao de Oro, Davao del Norte, Davao Oriental, Davao del Sur, Surigao del Sur ug Norte, Dinagat Islands, Agusan del Norte ug Sur ug gilauman nga anaa sa 30-60 kilometro matag oras ang gikusgon sa hangin.
Sa Northern Mindanao, apil ang mga lugar sa Camiguin, Misamis Oriental ug Occidental, Bukidnon, Lanao del Sur ug del Norte, North Cotabato ug Cotabato City, Northern portion sa Maguindanao, Zamboanga del Sur ug Zamboanga del Norte.
Hinuon, giklaro ni Ariel Rojas, usa sa mga weather specialist sa Pagasa, nga gawas ni Vicky wala nay namonitor nga lain pang daut nga panahon sa mosunod nga tulo ngadto lima ka adlaw.
Abiso sa Pagasa nga mag-amping ang tanang lugar nga gipailawom sa signal number 1 gumikan sa mga pag-ulan ug kusog nga hangin nga hayan maghatud og mga pagbaha, pagdahili sa yuta. (Orlando B. Dinoy)