Samtang nagpadayon og saka ang gidaghanon sa mga naapektuhan sa Covid-19, way puas ang mga sayentista pagpangita og paagi ug imbento og mga bakuna nga makapakgang sa pagkatap niini.
Dinhi sa ato, miabot na og 451,000 ka kaso sa mga nanga-Covid-19 unya 419,000 ini ang nangaayo. Samtang 8,757 ang nakalas sa tibuok nasud. Gani, kita maoy ikaduha, sunod sa Indonesia, sa may pinakadaghang natakdan sulod sa Habagatang Asya.
Samtang, ang America nagsugod na og apod-apod sa ilang libring bakuna gikan sa Pfizer ug BioNTech nga mga higanting kompaniya sa drugas, kita sab padayong nanikaysikay og himo og negosasyon sa Sinovac Biotetch para makapalit og 25,000 doses gikan sa China ug Russia.
Gipanghinaot nga moabot kini sa ato inig ka Marso 2021 para natong 108 ka milyong mga Pinoy. Gani ang atong mga dagkong kompaniya sa drugas mipirma na sab og kasabutan sa AstraZeneca para makapalit og bakuna inig ka Mayo o Hunyo puhon.
Bisan pa man og moabot na kining maong bakuna , daghan pa gihapon ang nagduhaduha sa pagpabakuna ini tungod kay nangahadlok sa posibling mga side effects.
Ang bakuna inay kini ipagawas, niagi sa makuting pakisusi og pagtuon sa Bureau og Food and Drugs (BFAD) una kini ma-aprobahan ug ipang-apod-apod.
Sama kung magpabakuna sa flu, ang side effects ini kasagaran hilanaton, maglabad ang ulo, kapoy ang lawas ug lapoy ang bukton nga gi-injectionan. Apan mawala ra kini sunod adlaw.
Padayon ug way undang ang mga pahimangno sa mga awtoridad sa pagtabon sa baba ug ilong pinaagi sa mask, o tissue o bukton kung mosikma o ubo aron dili manlisik, paglikay san paghikap sa mata, baba og ilong, palayo mga 6 feet apart kon social distancing, paminaw sa mga pahimangno sa mga doctor ug awtoridad, kanunay nga maghugas ug sabon sa kamot og limpiyuhan ang palibot gamit ang
disinfectant.
Ang mga kumon nga simtomas sa Covid-19 mao ang hilanat (sulod sa 2-14 ka adlaw), ubo, og paghangak sa pag-ginhawa.