Ang bag-ong pangulo sa Disaster Risk Reduction and Management Office (DRRMO) sa dakbayan sa Sugbo nga si magsisibya Ramil Ayuman niluwat og pasidaan niadtong Huwebes labot sa pagdaut sa panahon nga masinati. Iyang gipahimug-atan ang pagtawag sa atensiyon sa mga molupyo sa bukirang barangay sa posibling pagdahili sa yuta ug pag-awas sa kasapaan gumikan sa subsob nga mga pag-ulan.
Wala masayop si Ayuman sa iyang pasidaan nga iyang gisabwag pinaagi sa social media. Nagbinuntagay ang ulan nga nakapaapiki sa uban nga nipatuo sa iyang pasidaan kay nagkulang og kinatulgan pag-monitor sa dagan sa panahon. Ayaw mokalimot nga ang nagluwat sa maong pasidaan usa ka magsisibya nga sa dugayng panahon nagtubag og mga alarma ilabi na ang bagyo nga usahay kaluhaan og mga trahedya.
Niadtong panahon nga nagkauban pa mi sa usa ka newsroom, di maihap ang mga bagyo, landslide, baha, mga sementadong koral nga nahagba, mga punoan sa kahoy ug poste sa koryente nga natumba, mga balay nga nahandos padung sa ubos ug mga kinabuhi nga nakalas.
Wa pa ni labot sa mga barko, pumpboat ug sakayan nga nangalunod. Sa mga briefing sa newsroom mogawas nga ang sagad nga hinungdan sa pagka kalas sa mga kinabuhi mao ang kakulang sa kasayuran sa taliabot nga kalamidad ug ang kakulang sa pagpakabana.
Sa ato pa kining mga advisory o. pasidaan mahinungdanon kaayo aron magiyahan ang mga molopyo sa mga angay nga buhaton. Hinuon, responsabilidad sa mga buhatan, sama sa gidumala ni Ayuman, pagpasiugda og mga kongkretong kalihukan undaon nga malikayan o maminosminosan ang epikto sa matag kalamidad nga moigo.
Angay tang masayod dakong pundo ang gigahin alang sa maong katuyoan. Mao nga kong may mga punoan sa kahoy nga naghulga sa inyong kaluwasan i-report kana aron maputol. Kung ang taytayan nga kahoy masanapan sa tubig kong dunay baha ug delikado nga mahunlak, pailisi kay sa mag-ihap ta og mga kinabuhi nga madisgrasya. Hinuon ang dakong pangutana, unsa ka sensitibo ang mga nagdumala sa pagtubag sa maong mga panginahanglan. Kung kulang sa pagpakabana basin og dili pud makamao sa ilang trabaho.
Usa ka opisyal sa Office of Civil Defense nitug-an nako kaniadto nga dunay mga gipatambong og seminar labot sa risk reduction nga kutob ra sa pagpirma og attendance. Pagkahuman og pirma mawagtang. Unsa man tuoy makat-onan nga ang gipatambong ni mayor nagsuroysuroy man?
Naa say nitambong pero kulang sa intetes ngs makat-on. Kana bang moingon dayon, ah..nakaagi nako ana, humana ko ana, balik balik man ni ug bisan unsa nalang nga komento. Timan-i way perpekto nga paagi sa pagtubag og alarma, samot na nga way perpekto nga responder. Mao nay rason nga kong mosulod ka anang trabahoa, magsigi gyud kag tambong og mga tigom ug exercises apil na ang simulation.