Bisan tangtangon pa ang kwarantinas apan hugot nga ipasagop ang kamandoan sa new normal paglikay sa virus nga motapon dili lamang sa droplets, kon dili airborne, sumala sa US Center for Disease Control. Task Force Kasaligan gitahasan sa contact tracing. Oplan Bulabog mobungkag sa tapok-tapok. Police checkpoints nagpadayon. Gilugwayan ang state of calamity sa Septiymbre 12, 2021.
Samtang wala pay bakuna ug tambal walay kompyansa. Padayong gihugtan ang safety health protocols sama sa facemask, faceshield, panghugas sa kamot ug social distancing. Kaway-kaway sa kamot, bow, fist bump ug siko sa siko hulip sa lamano ug biso-biso agig pagtimbaya. Sa gihapon ang quarantine pass ug ID. Videoke/Karaoke sa sayong kagabhion, gidili sa adlaw aron dili madisturbo ang kabataan sa distance learning nga naa sa panimalay. Makagawas na ang kabataan ug senior citizens. Wala nay home quarantine dalhon sa isolation center.
Giusab ang social distancing sa publikong mga sakyanan gikan sa 1-meter ngadto sa .75 meter apan gisupak sa DOH subay sa rekomendasyon sa World Health Organization, hinuon ning ulahi, giaprobahan sa kabinete ang one-seat apart policy. Locally stranded ug mga langyaw makabiyahe sa mga barko ug ayroplano apan dunay lukaton o tumanon nga mga rekisitos.
Mga simbahan, buhatan ug business establishments gitugot ang 50 porsento sa kapasidad. Pipila ka opisina dili pabisitahan kay nag-obserbar sa minimum health standard. Gidid-an ang panagtapok nga lisod tumanon ang physical distancing.
Sa pandemya nasakripisyo ang kagawasan, kultura ug tradisyon. Cremation sa patayng lawas. Hadlokon ang pagbilar. Gilangkat ang pagduaw sa sam-ang niadtong adlaw sa mga santos ug kalag. Kamingaw sa pasko nga gihikaw ang pagpanaygon, party, pabuto ug torotot nga unta panahon sa panaghiusa ug pagmaya kay maoy natawhan sa Manunubos. Sa umaabot kapistahan ni Señor Santo Niño kanselado ang kalihokan, online ang misa ug virtual ang Sinulog.
Pangindahay nga mobalik ang normal nga kahimtang. Pres. Rodrigo Duterte mipagula og Executive Order nga maghatag og kagahom sa Food and Drugs Administration nga moisyo og emergency use authorization sa Covid vaccines. Nag-una sa tanyag ang Russia, China, Britania, US, UK ug UAE. Kinsa kahay unang magpatusok sa bakuna? (csa_1156@yahoo.com/09064648954)