Duha ka carnappers nadakpan sa mga sakop sa Highway Patrol Group (HPG) 9 uban sa Toyota Fortuner sa pantalan sa Dakbayan sa Dapitan, Zamboanga del Norte kagahapon sa buntag, Biyernes, Disyembre 18, pasado alas 10 sa buntag.
Matod ni Police Staff Sergeant Joel Perolino sa Carbon Police Station nga si Jeanrose Mae Recla, 26, taga Barangay Labangon, Siyudad sa Sugbo, nagpatabang sa kapulisan tungod kay nawa ang sakyanan nga iyang gipaabangan.
Kuyog ni Reclao ang nibarog nga saksi nga si Rogelio Buscato, 39, molupyo sa Barangay Tisa.
Nireklamo sila sa Carbon Police Station 5 gabii sa Disyembre 17, human nga wala na mabalik ang sakyanan nga Toyota Fortuner nga gipaabangan.
Si Cayner Bao, 42, mulopyo sa Barangay Tabok, Dakbayan sa Mandaue, ug Marilyn Umbay niabang sa Fortuner sud lang sa 24 oras dinhi sa Dakbayan sa Sugbo. Nahibulong nalang si Recla nga buntag sa Disyembre 18 nauli na unta ang sakyanan apan walay nipatim-aw.
Tungod sa kabalaka, nisumbong si Recla sa Carbon police nga gikawat ang ilang sakyanan.
Si Perolino nakig-alayon dayon sa HPG 7, subay sa kamanduan ni Police Captain Alvin Llamedo, aron mapugngan dayon ang sakyanan nga kinawat.
Ang HPG 7 nakig-alayon sa HPG sa Rehiyon 9 kini human nasubay pinaagi sa Global Positioning System (GPS) ang nahimutangan nila ni Bao ug Umbay nga dala pa gihapon ang Fortuner. Naa sila sa Dapitan.
Sa dali nga pagtubag sa reklamo, buntag as Disyembre 18 human nitugma ang gihatag nga impormasyon, gidakop silang Bao ug Umbay.
Ang mga nadakpan anaa pa karon sa Dapitan ug gikatakda nga moabot sila sa Sugbo aron mapasakaan og kaso. / BBT