Nakuha sa Dakbayan sa Lapu-Lapu ang ikaupat nga luna sa most improved highly urbanized cities sa tuig 2019 ubos sa tinuig nga Cities and Municipalities Competitiveness Index (CMCI).
Kauban sa Lapu-Lapu sa maong luna ang Baguio City ug Butuan City. Anaa sa ikatulong puwesto ang Caloocan City ug Parañaque City.
Samtang nakuha sa Angeles City ang ikaduhang luna ug anaa sa unang puwesto ang Malabon City ug Valenzuela City.
Ang maong tinuig nga ranking gi-develop sa National Competitiveness Council pinaagi sa Regional Competitiveness Committees inabagan sa United States Agency for International Development.
Ang Economic Dynamism, Government Efficiency, Infrastructure, ug Resilience ang upat ka mga pillar nga gibasehan sa rankings sa mga dakbayan ug munisipalidad.
Samtang, alang sa mga probinsiya magbase kini sa populasyon ug income weighted average sa mga overall score sa mga lugar nga sakop sa lalawigan.
Sa kinatibuk-ang 2019 competitive rankings sa highly urbanized cities sa nasud, anaa sa ika-22 nga luna ang Lapu-Lapu. Mas taas kini ikumpara niadtong tuig 2018 diin anaa sa ika-25 nga puwesto.
Alang sa Economic Dynamism ika-25 ang Lapu-Lapu sa nasud, sa Government Efficiency ika-21, sa Infrastructure ika-18, ug sa Resiliency anaa ang dakbayan sa ika-26 nga luna.
Matod ni Mayor Junard Chan nga ang nakab-ot sa Lapu-Lapu resulta sa paningkamot sa dakbayan nga makahatag og nindot nga serbisyo sa publiko.
“Nagbunga ang atong kakugi sa atong pagpangalagad, pagpanerbisyo sa katawhan. Ang atong puhunan ang atoa ra gayud kakugi sa pagsuroy ug pagtan-aw sa mga panginahanglanon sa atong mga kaigsuonan,” matod ni Chan.
Samtang niubos ang 2019 competitive rankings sa Dakbayan sa Sugbo diin anaa na kini sa ika-12 nga puwesto gikan sa ika-9 nga luna niadtong tuig 2018.
Sa Economic Dynamism anaa sa ika-12 ang Cebu City, sa Government Efficiency ika-15, sa Infrastructure ikaunom, ug sa Resiliency anaa sa ika-27 ang dakbayan.
Nakuha sa Quezon City ang unang puwesto sa 2019 competitive rankings alang sa highly urbanized cities ug gisundan kini sa Manila City ug Davao City. / NDT