Migallen: VisMin Super Cup ug professional boxing

Migallen: VisMin Super Cup ug professional boxing

DAGHAN ang na enganyo kalabot niining gihulma karon nga Vismin Super Cup basketball tournament.

Kon way kakulian ug dili lang mausab ang dagan sa nagpadayon nga mga negusasyon, hayan masugdan kini sa hinapos nga bahin sa Marso o sa sayong bahin sa Abril.

Ang Vismin Super Cup gihulagway nga usa ka dako og prestisyusong torneyo nga langkuban ug pagatigi-an sa mga teams gikan sa Visayas ug Mindanao.

Tumong niini, mao ang paghatag og kahigayonan ug pagdiskobre og mga lab-as nga mga talento gikan sa probinsiya ug ingon man niadtong mga adunay igong abilidad nga wa mahatagi og luna sa ubang mga dagkong lega sa nasod.

Labaw sa tanan, inubanan sa pagbulig ug pangaliya sa kahigayonan, makatampo usab kini og dakong tabang sa matag usa ilabi na ngadto sa mga players kansang panginabuhi anaa makasandig sa ilang abilidad sa basketball.

Kini maoy pipila lang ka mga rason kon nganong daghan ang naikag niini.

So far, dinhi sa Visayas pipila na ka mga teams ang nagpakita og interest nga mosalmot niini ug padayon pang gihitsas ang tanang mga papeles ug dokumento.

Lakip sa gilihok karon mao ang pagkuha usab og aprobal gikan sa Inter-Agency Task Force (IATF).

* * *

Nagtakodtakod kining pagpahigayon og professional boxing sa nasod taliwala ning nagpadayon nga pandemiya.

Saludo ug atong gidayeg kining mga promoters nga migahin og dakong kuwarta sa promotion nga di gyud mokita.

Way kita sa gate kay dili man papultahan ug patan-awan sa publiko, unya wa say makuha nga sponsors kay kadaghanan ron sa kompaniya naglisod man sab tungod sa sitwasyon karon sa tibuok kalibutan.

Unya madugangan pa gyud ang gasto tungod sa mga health protocols nga giimplementar sa Inter-Agency Task Force (IATF) diin mogasto pa ang mga promoters sa pagpa-swab test sa mga boxers ug tanang personnel nga na involved sa promotions.

Lakip niini ang mga boxing officials ug mga trainers/seconds sa mga fighters.

Gawas niini, ila pa kining tanggungon og pipila ka adlaw sulod sa bubble.

Unang misugal niini mao ang Omega Boxing Promotions sa International Pharmaceutical Inc. (lPI) niadtong Oktubre 7 sulod sa ilang compound sa dakbayan sa Mandaue.

Gisundan kini sa “The Restart” sa Sanman Promotion niadtong Nobiyembre 21 nga gibidahan nila ni kanhi world champion Marlon Tapales, ug two-time world title challenger Aston Palicte.

Sulod ning semanaha, laing duha ka sunodsunod nga promotions usab ang napahigayon nga, sa gihapon, ubos sa susamang promotions.

Niadtong Huwebes, Disyembre 17, 2020 ang Sanman Promotions ni JC Manangquil milihi sa ilang mga bag-ong recruit nga mga fighters nga gikan sa nasira nga Ala Boxing Gym.

Gitumbok mao sila si Jeo Santisima, KJ Cataraja, Melvin Jerusalem ug Esneth Dominggo nga yano ra kaayong mipaundang sa ilang mga kontra.

Nianang pagka Biyernes, duha gyud ka promotions ang gidalit na usab sa Omega Boxing Stable - usa sa adlawan pa ug usa sa hapon. Gawas sa kahago sa preparasyon isip promoter, dako-dako gyud ang gasto ani kay duha gud ka card sa usa ka adlaw.

Kaniadto pa kining aktibo kaayo sa mga sporting events - local, national ug international ang IPI.

Di kini magpanuko paggasto basta lang aduna silay saktong publicity sa ilang produkto kay kabahin kini sa ilang promotion ug marketing strategy. Bawi lang sa exposure sa product pinaagi sa media mileage. Hinaot nga wala ni nila mataligam-i.

Mora man gud og minus kaayo ang ilang coordination sa local media. Walay mga press releases nga maghatag og update sa mg sportswriters, walay press conferences bisan sa online lang. Maghuwat na lang ta og kanus-a ang away. (jun.migallen22@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph