Sa makadaghan nga higayon gipamahayag ni Pres. Duterte nga iya na gyud nga wagtangon ang mga pabuto panahon sa Pasko ug Bag-ong Tuig. Sama sa iyang gihimo didto sa Davao City sa dihang mayor pa siya nga iya gyud nga kusganong gidili ang pagpabuto. Sunod tuig kuno iya na gyud nga wagtangon. Pastilan no, sige man lang tang makadungog niini unya wala man gyud mahimo.
Dunay giingon: ‘Lovers of words have no place where honest work must be done.’
Susama ni sa motto sa usa ka politiko nga nag- ingon: ‘Buhat ang pasultihon, dili ang sulti maoy pabuhaton.’ Sama aning isyo sa pabuto. Magsige tag yaw-yaw batok sa pabuto apan wa kitay gihimo. Ambot usab kaha kon nganong lalisan pa man nato ning butanga nga adunay na man unta usa ka executive order (EO) niini ang Presidente.
Usa ka EO nga makalibog sab sabton kay samtang nanghinaway sa kadautan nga gikahatag sa mga pabuto, mihapuhap man gihapon sa mga negosyante sa pabuto.
Samtang ato kunong i-dili ang pabuto, apan pilion lang nato kay maluoy sab ta sa maligsan nga mga negosyo. Mao nga makapanghayhay si Juan de la Cruz ug makapangutana kon unsa ba gyud ka matinud-anon ang gobiyerno, pabor ba o supak sa pabuto?
Ug sa katapusan,makapatingala kanatong katawhan nga si Presidente Duterte igo man lang mo-ingon kada tuig nga ‘Wish ko lang’ maparehas na sa Davao City ang tibuok Pilipinas nga mingaw pa sa tirana ang Pasko kay wala nay buto-buto sa mga pabuto. Abi ba to nato og nasulbad na sa iyang EO ang kahusto o kahiwi sa pagtugot sa pabuto.
Pulos lang diay to laway kay wala man diay tumana o lihuka ang katuyo-an sa maong EO.
O kon gituman man, wala diay kini makatuman sa katuyuan niini? Kay nganong gikinahanglan pa man nga mangunsulta ang mga local chief executives kon angay bang wagtangon na ang pabuto panahon sa pagsugat sa Pasko ug Bag-ong Tuig? Aron mawagtang na gyud kining pabuto, did-an na ang paghimo niini ug hatagan og laing panginabuhian ang mga anaa ning maong industriya. (bobbygnalzaro@gmail.com)