IYA kang higalaon, danihon ug kon mahigugma ug magkauyab, manghuwam na og kuwarta.
Mao ni ang giingong modus sa usa ka 39 anyos nga babaye nga napriso ug gipasakaan og kasong estafa sa iyang giingong boyfriend nga taga Carcar City.
Ang suspek nga giilang si Jozyl Taylor, 39, nasikop sa entrapment operation sa Carcar City Police Station, Regional Intelligence Division (RID) ug Highway Patrol Group (HPG) 7 sa Miyerkules, Disyembre 16, 2020 sa Poblacion 3, Dakbayan sa Carcar.
Si Taylor, taga Barangay Tisa, Dakbayan sa Sugbo, gipan-an og P30,000 nga boodle money, matod ni Police Staff Sergeant Regie Amad, sa Carcar City Police.
Ang biktima nga si Don (di tinuod nga ngan) maoy nangayog tabang sa Carcar City Police human giingong nakahuwam na si Taylor og P116,000 kaniya, apan wa mobayad.
Ang iyang modus, matod ni Amad, makig-chat kini sa giingong iyang biktimahon.
Kon madani ug manguyab ang lalake, iyang sugton ug kon masuod na, huwaman og kwarta.
“Ang iyang pamaagi ani, Sir, iyang sugton kunohay kadtong manguyab kaniya ug makuha na ang pagsalig didto na sugdan niya nga pamaraygan,” nagkanayon si Amad.
Si Taylor giingong nakahuwam na kang Don og P116,000, nga way ilis-ilis.
Nisulti kanila si Don nga unang ni-chat kaniya si Taylor dayon nagkahigala sila ug dayon nagkauyab.
Mga duha ka buwan human sa ilang relasyon, nanghuwam kini kaniya og tigi-tigi nga ang tanan niabot na og P116,000.
Manghuwam na usab unta kini kaniya og P30,000 busa, dinhi na siya magduda nga gibinungan ra siya sa babaye.
Tungod niini, nidangop na si Don sa kapulisan sa Carcar aron mahiuli kaniya ang kwarta.
Ila dayon nga gi-set up ang entrapment operation sa abag sa RID ug HPG tungod sa giingong laing mga reklamo batok kang Taylor.
Sa entrapment, gisakmit sa HPG 7 ang usa ka Toyota Vios kay wa makapakitag dokumento si Taylor nga iyaha ang sakyanan.
Ang awto naa sa buhatan sa HPG 7 gi-impound.
Nagduda si Amad nga di lang si Don ang biktima ni Taylor busa ilang giawhag nga makabisita sa ilang buhatan.