BISAN pa man sa sayo nga paglibkas sa Signal No. 1 sa Sugbo, moabot sa 1,105 ka mga indibidwal gikan sa unom ka mga apektadong lungsod ang gipabakwit sa mas luwas nga mga lugar tungod sa pagkuso-kuso sa kusog nga hangin ug uwan nga epekto sa bagyong Vicky sa Disyembre 18.
Subay sa impormasyon gikan sa Cebu Provincial Disaster Risk Reduction and Management Office (PDRRMO), nalakip sa mga lungsod nga nakasinati og storm surge mao ang Argao, Boljoon, Compostela, Dalaguete, Dumanjug ug Danao City.
Gawas sa maong mga lugar, nalakip usab ang dakbayan sa Talisay sa Sitio Crusan, Barangay Bulacao diin dunay landslide.
Laing dunay landslide, apan wa makamugnag kadaut sa kabtangan mao ang sa Barangay Campo 4, diin duha ka mga sityo ang naapektuhan.
Matod ni Barangay Captain Rowena Edar nga nahinabi sa Superbalita Cebu nga ang naigo mao ang sityo Bogo ug ang atbang sa ilang barangay hall.
Si Edar niingon nga nahunlak ang yuta tungod sa pagsigeg uwan.
Samtang si Manipis Barangay Captain Joselito Laurente mibutyag nga duna usay duha ka mga sityo sa iyang barangay nga nag landslide.
Matod ni Laurente nga ang sityo Languyon, duol sa Languyon Bridge ug sityo Telepeno, naigo sa landslide.
Nagpadayon ang pagkuha sa nidahili nga yuta.
Sa lungsod sa Compostela, moabot sa 30 ka mga non-motorized bangka ang nangadaot samtang sa lungsod sa Boljoon moabot sa 12 ka mga motorized bangka usab ang naguba.
Tungod sa pagbaha, di momenos 25 usab ka mga balay ang naapektohan sa lungsod sa Dalaguete.
Subay sa pagsaka sa bawod, duha usab ka mga mananagat ang gikataho nga na missing sa lungsod sa Sibonga sa Disyembre 18 sa buntag, apan luwas na kini nga na rescue sa disaster team human napadpad sa barangay Taloot, lungsod sa Argao sa Disyembre 19.
Gipahibaw sa PDRRMO nga luwas ug way naangol ug nakapauli na usab ang mga residente nga gipabakwit sa mga tunghaan ug covered courts. (dugang taho ni BBT)