KINAHANGLAN na nga ang mga tawo magsul-ob og face masks ug face shields kon anaa sa mga pangpublikong lugar subay sa labing ulahing lagda sa Inter-Agency Task Force for the Management of Emerging Infectious Diseases (IATF-MEID), ang IATF Resolution 88.
Unsay buhaton sa kapulisan kon dunay mga tawo wa magsul-ob og face mask ug face shield? Si Police Brig. Gen. Ildebrandi Usana, spokesman sa Philippine National Police (PNP), niingon nga inay dakpon dayon, hatagan sila sa kapulisan og face mask ug face shield.
Mao unta nay gibuhat sa kapulisan sa pagsugod sa Covid-19 pandemic. Matod ni Usana, ang mga lokal nga kagamhanan nay mag-igo sa silot sa nakalapas. Ang mga lokal nga kagamhanan sab, sama sa Cebu City nga naglisod pag-liquidate sa anti-Covid-19 budget nga P3.5 bilyones, manghatag unta og libre nga face masks ug face shields.
Si Health Secretary Francisco Duque III miingon nga naaprobahan na nga ang pagsul-ob og face masks, face shields ug ang pag-obserbar sa physical distancing nga labing menos usa ka metro makahatag og 99 porsiyento nga proteksyon gikan sa coronavirus nga nagpabilin pa hangtod karon.
Sa una, face mask ra man unta. Apan si Health Undersecretary Maria Rosario Vergeire niingon nga di sila morekomendar sa face shield niadtong mga tawo nga dunay respiratory issues, sama sa mga hubakon ug kadtong maglisod sa pagginhawa.
Angay nga klaruhon kining butanga sa IATF ug sa mga lokal nga kagamhanan nga mopatuman sa lagda sa pagsul-ob og face shield. Unsay kapuslanan kon 99 porsiyento kon di matakdan sa Covid-19 apan mamatay ka kay di ka makaginhawa?
Dako nakong garbo nga niamin nako ang akong pag-umangkon, si Police Brig. Gen. Ronnie Montejo, ang bag-ong direktor sa Police Regional Office 7. Apan kon si Rep. Bayani Fernando sa Marikina ang pabut-on, wad-on na ang pag-amin ug paglamano, ang karaan nga timailhan sa pagrespeto ug simbolo sa panaghigalaay sa mga Pilipino Tumong sa iyang House Bill 81849, ang “Bating Pilipino Para sa Kalusugan Act..”