GITUGOTAN na sa Philippine Coast Guard (PCG) District Central Visayas nga makalawig og balik ang mga barko nga walay gipabiyahe ngadto sa ilang destinasyon nga wala nay warning signal sa bagyong ‘Vicky.
Ang PCG Visayas milibkas na sa suspension sa mga biyahe padulong sa Masbate, Surigao, Nasipit, Agusan del Norte, Leyte ug Escalante City sa Negros Occidental human sa paglabay sa bagyo.
Ang Philippine Atmospheric Geophysical and Astronomical Services Administration (Pagasa) nagkanayon nga ang bagyong Vicky padayong nag-irog duol sa northern-central portion sa Palawan niadtong Sabado sa hapon, Disyembre 19.
Si Vicky dunay dala nga hangin nga 45 kilometers per hour (km/h) ug huros nga moabot og 55 km/h. Nagpabiling gibanabana si Vicky nga usa ka tropical depression sa iyang paglatas sa kinatibuk-an sa Philippine Area of Responsibility (PAR) apan gipaabot nga mahimong tropical storm o mas mokusog sa paglabang sa West Philippine Sea padulong sa gawas sa nasod.(WBS)