MAKALILISANG ang nahitabo tali pulis ug mag-inahan. Misugat sa kabuntagon sa netizens ang pagpamusil sa pulis nga di lang usa o duha ka buto ang milanog, apan sa makadaghan.
Sa nahitabo, gilayong nagpagula og pamahayag ang kanhi hepe sa kapulisan sa nasud nga si Senator Panfilo Lacson. Nanawagan sa pamunoan sa Philippine National Police (PNP) ang senador nga "show no mercy" ngadto sa pulis nga brutal nga mipusil sa mag-inahan sa Paniqui, Tarlac.
"If what's on video tells the whole story, I enjoin the Philippine National Police leadership to show no mercy. They should spare no effort to make sure that he rots in jail. He's the last policeman that they need in the force," ingon ni Lacson sa usa ka press statement, Lunes.
Nasagmuyo pag-ayo si Lacson sa video clip nga iyang nakita nga giayog pusil sa pulis nga si Senior Master Sergeant Jonel Nuezca ang mag-inahang biktima nga sila Sonya Gregorio, 52, ug ang anak niini nga lalaki, Frank Anthony Gregorio, 25.
Wala suma pa mituhop sa kasingkasing sa suspek nga pulis ang motto sa kapulisan nga "To Serve and Protect."
"The PNP should always uphold its motto 'To Serve and Protect.' That includes taking appropriate steps to protect our people from scalawags in their ranks, whether they are on duty or not," dugang sa opisyal.
Ang nahitabo unta makuhaan og leksyon sa tanang mga pulis, nga wagtangon sa kaugalingon ang 'trigger-happy' kung naa man. Ipamata sa hunahuna ug kasingkasing ang panultihong, "To Serve and Protect."
Di lang sa mga pulis, kun di kakuhaan kini og leksyon sa tanan, nga mas ipasulabi sa hunahuna ang pagkamapaubsanon ug ang pagsabot sa mga init nga mga takna. Di ipaagi sa init sa ulo. Istoryahan ang problema, kay kining tanan dunay kasulbaran.