KIDAPAWAN CITY -- Gikalisang sa mag-uyab nga misulod sa lodging house human sila gibato alas 7:30 sa gabii niadtong Dominggo, Disyembre 20, sa probinsya sa Cotabato.
Giila ang duruha nga sila alyas Melie ug alyas Ricky, mga molupyo sa Pikit North Cotabato.
Sa taho gikan sa kapulisan nga nagkita ang mag-uyab sa Municipal Plaza sa Pikit tungod kay ulan-ulan unya gitugnaw ang ilang pagbati sa matag usa nakadesisyon sila nga musulod sa lodging house.
Pasulod na ang mag-uyab sa Bam Bams Lodging House sa Pioneer Street, Barangay Poblacion, Pikit North Cotabato, kalit miagi ang duha ka taw nga nag-motor ug gibato sila.
Abtik nga nakatago sa gate sa lodging house ang mag-uyab hinungdan nga wala maigo.
Misibat sab dayon ang mga suspetsado paingon sa hilit nga dapit sa Pikit.
Nahiabot sab dayon ang mga pulis sa Pikit aron nga mag-imbestiga.
Bisan nakuratan sa hitabo ang mag-uyab nahinayon gihapon ang ilang pagtagay sa kalipay ibabaw sa kama gumikan dunay pulis na nga nagbantay gawas sa lodging house.