GIILA sa kagamhanan sa Lungsod sa San Fernando, Cebu ang pag-abag nga nahatag sa duha ka mga kaalyadong kompaniya aron masagubang sa lungsod ang krisis dala sa pandemiya sa coronavirus disease (Covid-19).
Si Mayor Lakambini G. Reluya, DM nitunol sa mga plake ngadto sa Taiheiyo Cement Philippines, Inc. (TCPI) ug Solid Earth Development Corp. (SEDC) sa sa dihang gipadayag sab niya ang 2020 State of the Municipality Address.
Midawat sa pasidungog sila si Atty. Dennis B. Tenefrancia, pangulo sa kompanya, uban sa iyang community relations officer Gines T. Boltron, alang sa minahan ug tigpadagan og pantalan.
Mao sab alang sa tighimo og semento si Vanessa N. Bongcawil, tagduma sa community and general affairs, uban sa iyang kaabag nga si Brijade Navasquez, didto sa San Fernando Sports Complex.
“Makahuloganon nato nga anaa ta dinhi alang sa atong mga silingan panahon sa panginahanglan ug makaabag kung kini labing mahinungdanon,” mipahayag si Tenefrancia. “Makadasig kini nga maila nga naka-abag ta.”
Unang midonar pagka-Marso ug Abril ang TCPI ug SEDC ngadto sa mayor og 170 ka mga sako sa 50 kilos nga bugas aron mapagaan ang ang dihadihang epekto sa labing apektado sa dihang gipahamtang sa kagamhanan ang kwarentina harun mapagan ang gikahintapang sakit.
Midonar pa ang SEDC og dugang 105 ka mga sako 50-kilos nga bugas, direkta na sa mga nag-abi-abi ug silingang mga komunidad, ug dugang managlahing mga inimpakeng pang-alima sa samang mga dapit nga gitunol makaduka sa Abril ug Mayo.
Pagka-Hulyo, mitunol pa ang SEDC og pipila ka mga kagamitan ngadto sa Municipal Health Office alang sa mga frontliners nga maoy nag-atiman sa mga kompirmado sa CoViD-19, mga persons under investigation (PUI) ug persons under monitoring (PUM) sa kwarentinahan sa lungsod.
Uban sa Triple 8 Resources Development, mipadala sab ang SEDC og tubig ngadto sa Bugho, Magsico, Tabionan ug Tinubdan sa dihang gipa-ubos ang Sugbo sa mas hingpit nga kwarentina nga di na makapangawos ang mga lumolupyo.
Tigsangkap ang SEDC sa TCPI og mga minerals nga gikinahanglan sa paghimo’g semento ug tigpadagan sa pantalan asa gikarga ang mga produktong Grand Cement aron mapadala sa pipila ka dapit sa nasud. (PR)