Nag-trending ang The Clash Season 3 Grand Finals niadtong Dominggo tungod sa nagkampiyon nga Cebuanang si Jessica Villarubin nga taga-lungsod sa San Fernando.
Ang grand champion sa unang season sa The Clash niadtong 2018 taga-Cebu sad nga si Golden Canedo nga gikan sa Minglanilla.
Mao na kaha ning higayona nga makuha sa GMA ang pagbati sa mga Bisaya? Mao na kaha ning panahona nga mailog na nila ang trono isip No. 1 TV station sa Visayas ug Mindanao? Hmmm...
“TUBIG QUEEN”
Kaila pa tingali mo ni Dodoy Teberio alyas “Tubig Queen” nga nisikat sa talagsaon niyang estilo sa pagpaninda og tubig sa kadalanan sa SM City Cebu?
Naa na diay siya nagtrabaho karon sa DILG (Dept. of the Interior and Local Gov’t.) sa lungsod sa Consolacion isip contact tracer.
Mao nang wala siyay palta sa misa de gallo sa San Narciso Parish church bisan pa sa grabeng uwan ug baha niadtong Biyernes tungod sa bagyong Vicky kay naa ra siya nag-abang sa duol.
Ang iyang Christmas wish nga ma-extend pa kuno unta ang iyang kontrata sa DILG nga matapos sa Dec. 31 kay hangtod kuno karon bawal pa gihapon ang maninda sa kadalanan nga mao ray bugtong gisaligan sa ilang pamilya.
MALAS O SUWERTE
Tulo na lang ka adlaw Pasko na. Unsa kahay naghuwat nato sa 2021 nga Year of the Metal Ox o baka kon sa Bisaya pa.
Sigon sa Chinese zodiac ang suwerteng color sa 2021 mao ang white, yellow ug green. Samtang ang suwerteng mga numero ang 1 ug 4 or 41 ug 14 basta duna gyuy 1 ug 4.
Ayaw kuno mog sul-ob og blue kay malas nang kolora sa 2021. Malas sad ang numero 5 ug 6. Ay tuo na lang mo aron madali. Hehe...
CHRISTMAS SALE
Nagpadayon karon ang “12 days before Christmas Sale” sa Gasano Main, Country Mall, ug sa mga sangang tindahan nila sa Balamban, Bogo ug Moalboal nga modagan hangtod sa Dec. 24 diin mga dagkong diskwento ang naghuwat ninyo.
Wala silay artista kay Covid lagi pero sa sunod tuig kon moarang-arang na ang sitwasyon siguradong mobalik ra gihapon sa normal ang tanan.
Sa atong mga suki nga nibasa karon, “Thank you, thank you, ang babait ninyo thank you.” Merry Christmas!