2 ka Cebu City ‘drug lords’ napatay

UPAT ka mga lalake, duha kanila taga siyudad sa Sugbo, nga giingong drug lords napatay sa giingong engkwentro tali sa kapulisan sa Dakbayan sa Taguig sa Metro Manila sa Lunes sa kaadlawon, Disyembre 21, 2020.

Atol sa press briefing ni Police General Debold Sinas sa Camp Crame, iyang giila ang duha nga sila si Christopher Ocarol, taga Barangay Pasil, Siyudad sa Sugbo, ug Allan Catalan.

Sila mga ex-convict ug nagbase na sa kaulohan dihang niinit og sugod ang kampanya batok sa illegal drugs sa Dakbayan sa Sugbo.

Si Ocarol, naila sa alyas nga Rikking, nadakpan niadtong 2006 sa buy-bust sa Cebu City Police Office sa Pasil.

Si Catalan, taga Barangay Kamagayan, Dakbayan sa Sugbo, kinsa gitumbok usab nga nalambigit sa illegal drugs, ni-survive sa usa ka ambush niadtong 2008.

SUPPLIER

Ang duha gitumbok ni Sinas nga maoy drug supplier sa Dakbayan sa Sugbo ug Central Visayas, diin kinilo sa illegal nga drugas ang ipadala.

Giingong nakigpinusilay sila si Ocarol sa mga pulis nga nilusad sa anti-drug operation sa C6 Road sa Barangay Napindan, Siyudad sa Taguig alas 5:35 sa Lunes sa kaadlawon.

Nakasakmit ang mga pulis og 40 kilos sa gituohang shabu nga adunay kantidad nga P272 million ug mga armas ug daghang mga bala.

Sigun ni Sinas nga ang duha notado na bigtime druglords sa Central Visayas.

Sila kanhi mga binilanggo sa New Bilibid Prison, apan nakagawas niadtong 2015 human nga na-dismiss ang kaso sa Court of Appeals.

Ang ilang supply sa illegal nga drugas alang sa Siyudad sa Sugbo ug Rehiyon 7 nga gihulagway ni Sinas nga taas ang halin sa illegal nga drugas, ikaduha sa Metro Manila.

Sila ang mo supply sa lalawigan sa Bohol, Negros Oriental ug Siquijor.

Usa sa mga kasaligang tinubdan sa Camp Crame mibutyag sa Superbalita Cebu nga sukad sila nakagawas niadtong 2015, sila nibalik sa ilang illegal nga negosyo sa Siyudad sa Sugbo.

Apan sa dihang nidaog si President Rdorigo Duterte ug subsub ang kampanya batok sa illegal nga drugas, nibalhin sila sa kaulohan diin sila na ang tig supply sa mga durugista sa Sugbo.

“Balhin-balhin na sila, adto sa Bohol. Unya balik na sad sa Cebu City labi na diha sa Pasil. Mga big time nang mga tawhana,” matod sa police official nga taga Sugbo nga naa na sa Camp Crame.

Sukad milingkod isip pangulo sa National Capital Region Police Office si Sinas, ila na kining gipangita.

Matod ni Police Brigadier General Ronnie Montejo, pangu sa Police Regional Office (PRO) 7, nga silang Ocarol ug Catalan naa na sa ilang listahan nga tinubdan sa illegal nga drugas sa mga kasikbit nga siyudad sa Taguig.

Tungod sa ilang kamatayon, dako kinig epekto sa supply sa illegal nga drugas sa Central Visayas.

“Dako ni silag epekto sa supply reduction diri sa Cebu kay sila man ang tig-supply diri, katong naa pa mi ni Chief PNP sa NCRPO. siya ang RD nya ako sa QCPD, usa sa akong officer maoy iyang gitagaan og task ana,” butyag ni Montejo.

LAING BUY BUST

Samtang sa Sugbo, moabot sa kapin sa usa ka kilo nga shabu ang nasakmit sa mga operatiba sa tulo ka managlahi nga mga buy-bust.

Usa ka joint anti illegal drug operation sa Regional Drug Enforcement Unit (RDEU) 7 ug Philippine Drug Enforcement Agency (PDEA) 7 nisangko sa pagkasikop sa lima ka mga durugista. Ang mga operasyon gimando ni Police Lieutenant Colonel Benedict Poblete, pangu sa RDEU-7.

Unang buy-bust gihimo sa Sityo R.Palma sa Barangay San Roque, Siyudad sa Sugbo pasado alas 10 sa buntag sa Lunes, Disyembre 21, 2020 nga niresulta sa pagkasikop ni Carlito Ablay, 44.

Nasakmit gikan kang Ablay ang 500 gramos sa shabu nga mobalor og P3.4 milyones base sa Dangerous Drugs Board (DDB) value.

Samtang duha usab ang nadakpan sa laing drug bust pasado alas 11 sa buntag sa Sityo Avocado, Barangay Mambaling, Cebu City. (AYB, BBT)