Samtang normal nga reaksyon mao ang pagkondenar sa pagpusil-patay sa inahan ug iyang anak niining usa ka pulis tungod lang sa lalis magsilingan didto sa Paniqui, Tarlac, apan murag nakadawat og lahi nga memo ang mga DDS.
Alang sa wala pa makabasa sa maong hitabo o nakakita sa video niini, si Police Senior Master Sergeant Nuezca nipusil og makaduha sa mga ulo nilang Sonya Gregorio, 52, ug ang anak niini nga si Frank Anthony Gregorio, 25. Walay armas silang Gregorio apan daw nasakitan si Nuezca sa mga pulong sa inahan.
Ang anak ni Nuezca niingon kang Sonya nga usa ka pulis ang iyang amahan. Apan nitubag ang inahan nga “I don’t care.”
Aw, nasuko hinuon pagsamot ang pulis ug niingong tiwason na lang. Namusil dayon kini.
Normal nga reaksyon gyud ang pagkondenar dayon sa hitabo. Apan, lahi ang awtomatik nga reaksyon sa mga DDS.
Wa sila mokondenar sa pulis. Mas nasuko sila sa mga tawo nga mga kritiko sa pulis kay gilambigit ang heneral nga kahimtang karon kabahin sa pagkuyanap niining pagpamatay ug paglambigit ni Presidente Rodrigo Duterte.
Di man gud mawala sa atong alimpatakan ang gisulti sa Pangulo batok sa human rights ug awhag sa kapulisan nga kon dunay gamayng sipyat ang suspek, patyon dayon.
Kining ingon niini nga istorya sa Presidente niresulta sa giingong “impunity” kun lisensya sa pagpatay. Nagtuo na ang kapulisan nga murag Agent 007 nga dunay “license to kill.”
Gawas sa amahan nga pulis, daw nagtuo pa gyud ang iyang anak nga sakto lang ang iyang amahan nga mamusil og silingan. Kini ang labing ulahi nga hitabo kabahin sa pagpamusil sa lain-laing dapit sa nasud kay duna kitay Presidente Rodrigo Duterte nga wa motahod sa katungod.
Awtomatik sab dayong depensa ang mga DDS nga walay labot ang Presidente. Mga dilawan ang nanaway. Bisan paglitok na lang nga wala sila makauyon sa maong pagpatay.
Manghinaot na lang ko nga mausab ang memo alang sa mga DDS nga motimang niining hitaboa, bisan molitok na lang og gamayng pagkondenar.
LACSON
Sakto ang kanhi PNP chief nga si Sen. Panfilo Lacson. Kinahanglang di magpakita og kalooy ang kadagkuan sa kapulisan niining Nuezca nga di gani duty dihang namusil.