Espinoza: Mosaka pa ang kaso sa Covid-19

PASKO na. Upat na lang ka adlaw gikan karon Pasko na. Merry Christmas! Ang hugot nga pagtuo sa mga Kristiyano, labina sa mga Katoliko, wa mausab bisan pa ning makalilisang nga sakit, Covid-19 nga daghan na ang namatay sa tibuok kalibutan. Niadtong primero nga Misa de Gallo, wa makapugong ang kapulisan ingon man ang mga pari sa gidaghanon sa nanimba.

Giabot og kabalaka ang kadagkoan sa Department of Health (DOH-7) sa posibilidad nga mosaka ang takod sa Covid-19 tungod sa wala pagtuman sa social distancing. Nagsuwak ug nagsikit ang mga nanimba nga tua na gani nagbarog sa dalan tungod kay dili na makasulod sa simbahan.

Si Dr. Jean Loreche, ang tigpamaba sa DOH-7 sa interbyo sa SunStar Cebu, nagpasabot nga andam ang mga ospital ingon man ang mga isolation center alang sa pagdawat unya sa matakdan sa Covid-19 ingon man ang mga health workers tungod kay miubos man karon ang mga naigo sa corona virus.

Ning panahon sa Pasko di kalikayan ang pagtapok labina kon dunay party. Gani, karon sa mga tindahan, gamay o dako, daghan ang mga tawo kay namalit og mga butang o regalo tungod sa atong naandan nga tradisyon, nga manghatag ning panahon sa pagsaulog sa pagkatawo ni Hesukristo, ang atong manunubos.

Bisan tuod niminos na ang gidaghanon sa mga naigo sa coronavirus sa Cebu, labina sa dakbayan sa Sugbo, nga kaniadto maoy numero uno nga naigo sa Covid-19, apan dili kalikayan ang kahingawa sa atong lokal nga opisyales ug health workers o frontliners sa purohan nga mosaka unya og balik ang gidaghanon sa masakit sa Covid-19. Atong mahibaw-an unya epekto sa Enero 2021.

Usa sa mga hinungdan nga mihinay ang pagtakod sa coronavirus mao ang pagtuman sa mga health protocol sama sa pagsul-ob og mask ug face shield. Apan lagi duna gihapon mga labad og ulo kay nagsul-ob man tuod og mask ug face shield apan dili husto kay ang mask naa ra suwang ug ang face shield gitungtong sa ulo. Naa say mga tawo nga og mosulti iubos ang mask. Susmaryosep!

Niadtong Dominggo sa hapon didto mi sa usa ka mall sa dakbayan sa Mandaue diin namalit mi og pagkaon ni Doc Malou. Pag-abot namo sa cashier dunay usa ka edaran nga nagbayad nga ang iyang mask naa sa suwang ug ang face shield sa ulo. Gibadlong ni doktora apan igo ra siya mitan-aw namo. Ang cashier wa lang sad mobadlong.

Ang kakuwang sa disiplina maoy usa ka dakong problema sa kadaghanan natong mga Filipino. Bisan sa kadaghan nga pahimangno gikan sa DOH, IATF ug kapulisan daghan gipahon ang mga badlongon, nga matud pa ni Presidente Digong “mga gahi’g ulo” niadtong miaging’ mga buwan nga daghan kaayo ang nasakit ug namatay sa Covid-19 sa Dakbayan sa Sugbo.

Mga higala, sa atong pagsaulog sa Pasko tungod sa atong pagka Kristohanon ayaw hikalimti ang pagsunod sa mga health protocol.