DIHANG nag-viral ang pagpusil-patay sa Parañaque police sa iyang mga silingan nga inahan ug anak alas 5 sa hapon sa Dominggo, Disyembre 20, 2020 didto sa Barangay Cabayaoasan, Paniqui, Tarlac, managlahi nga komento sa akong mga nahinabi labot sa maong hitabo.
Daghan ang nasuko sa suspek nga si Police Senior Master Sergeant Jonel Nuezca, kinsa maoy midul-it pagpusil sa ulo sa mag-inahan nga si Sonya Gregorio, 52, ug anak niyang Frank, 26.
Kinsa bay di bation og kasuko ngadto sa suspek nga klaro kaayo ang iyang gihimo ngadto sa mga biktima nga na-rekord sa video nga gipaskin sa social media.
Sa gihimo sa suspek, naangin ang imahe sa kapulisan sa nasod, apan giingon sa kapulisan nga "isolated case" lamang ang nahitabo.
Tinuod bitaw, ang gihimo ni Nuesca di angay nga iangin ang mga tarong nga pulis nga tinud-anay nga nagserbisyo sa katawhan.
Gingilngigan
Kadaghanan sa akong mga kauban sa trabaho niingon nga di nila maagwanta ang pagtan-aw sa pulis kay ngilngig kaayo ang hitabo.
Ngilngig gyud tinuod, ilabina nga wala pa sila nakakita og tawo nga gipatay sa gun-for-hire.
Apan, sa akong bahin, di na ko ngilngigan kay nagtungha pa ko sa kolehiyo, makaduha ako nakasaksi nga gidul-it pagpusil ang mga giingon nga drug pushers kaniadto diha sa dalang Anda ning siyud sa Davao. Sa maong lugar man gud ako nagtrabaho kaniadto mao nga nakasaksi na ako sa mga insidente sa pagpatay.
Sa pagtrabaho na nako sa radyo, nakakita na usab ako sa mga ngilngig nga krimen sama sa mga gipangsalbids sama pagbanhig-patay sa among kauban sa buhat nga si anhing Jun Pala ug Ferdie Lintuan pila na katuig ang milabay.
Wa man ko gingilngigan sa akong nakita, apan hilom akong nag-ampo nga masilotan unta ang mga naghimo sa krimen.
Nganong nisiaw?
Sa among panaghisgut-hisgot sa hitabo, naay nangutana: (a) nganong misiaw man ang mga pulis karon?; ug (b) nganong gigamit sa mga "Dilawan" ang isyu ug ilang giangin si Pangulong Rody Duterte?
Usa namo ang mitubag:"Tungod ni kay giingon sa presidente nga gamay lang sipyat, pusila dayon ninyo!"
Ning puntoha nitubag ako nga ang gipasabot sa pangulo mao ang insidente diin mahulog sa peligro ang kinabuhi sa pulis atol sa ilang police operation.
Pero, alang nako, aron di gyud mosiaw ang mga dautan, di gyud magpakabuta-bungol ang maayong lungsoranon. Maayong Pasko!