TUNGOD sa paglampurnas sa baha sa mga agrikultural nga lugar sa miaging mga adlaw tungod sa Bagyong Vicky, subling nanawagan ang Mindanao Development Authority (Minda) alang sa pagmugna og Mindanao River Basins Development Authority (MRBDA) alang sa komprehensibong pamaagi sa kanunay nang pagbaha sa rehiyon.
Gisulti ni Minda Chairperson Secretary Emmanuel Piñol sa iyang Facebook post nga ang sugyot alang sa MRBDA, unang gipresentar napulo na ka tuig ang nakalabay, ug subling gihisgutan sa bag-ohay lang nga Mindanao River Basin Development Council Meeting niadtong miaging bulan.
Human sa tigum, gikanayon ni Piñol nga si North Cotabato First District Representative Joel Sacdalan miduso og balaudnon sa Kongreso alang sa dinaliang pagmugna sa ahensiya human sa grabeng pagbaha sa Luzon.
Sumala niya nga ang pagmugna sa MRBDA gitumong sa paghiusa sa tanang paningkamot aron nga matubag ang pagbaha, naglakip sa pagsusi og balik sa mga polisiya sa gobyerno bahin sa kakahoyan ug minahan.
Gitataw sa pangulo sa Minda ang dinalian nga pamaagi nga natuki sa makausa pa tungod sa mga pagbaha nga miigo sa Agusan ug Davao River Basins karong semanaha.
Sa kasamtangan, duna lay duha ka aktibong River Basins Management Council, nga pulos milihok nga managlahi sa matag usa. Kini mao ang Agusan ug Cotabato -- nga pulos gipangulohan sa mga relihiyusong lideres kon diin ang local executives ug mga nasudnong ahensiya isip mga miyembro.
Ang laing unom pa ka mga river basins sa Mindanao mao ang Agus River Basin, Cagayan de Oro River Basin, Tagoloan River Basin, Tagum-Libuganon river basin, Davao river basin ug Buayan-Malungon river basin.
Ang Mindanao River Basin (Cotabato) ug Agusan River Basin sa Caraga region maoy duha ka mga dagkong river basins sa isla sa rehiyon.
Samtang sa pinakaulahing katikaran, ang National Disaster Risk Reduction and Management Council nitala og walo ka mga tawo ang patay sa Bagyong Vicky.
Si Vicky mipalunop sa daghang bahin sa habagatang bahin sa Pilipinas, naglakip sa Bicol, Eastern Visayas, Caraga, ug Davao Region. (Ralph G. Llemit)